Կուսակցությունների գրանցման և ստեղծման ընթացակարգը կհեշտացվի

ԱԺ արտահերթ նիստում երկրորդ ընթերցմամբ և ամբողջությամբ ընդունեց «Կուսակցությունների մասին» սահմանադրական օրենքում փոփոխություններ ու լրացումներ կատարելու և կից օրենքներում փոփոխություններ ու լրացումներ կատարելու մասին օրենսդրական փաթեթը, որով նախատեսվում է հեշտացնել կուսակցությունների գրանցման և ստեղծման ընթացակարգերը:
«Փաթեթում նախատեսվում են էական փոփոխություններ, ազատականացում և հեշտացում կուսակցությունների գրանցման և ստեղծման հետ կապված: Շատ կարևոր ուղղություն է կուսակցությունների ներսում ներքին ժողովրդավարության խրախուսման մի շարք մեխանիզմների ներդրումը, այդ թվում՝ համագումարի լիազորությունների ընդլայնումը, պարտադիր գումարման պարբերականության հաճախականացումը, որոշումների կայացման փակ, գաղտնի ռեժիմի ավելացումը՝ որպես օրենքի պահանջ»,- նախագծի՝ դեռ առաջին ընթերցման ժամանակ հայտարարել էր «Իմ քայլը» խմբակցության պատգամավոր Համազասպ Դանիելյանը։
Օրենքի փոփոխությունները կնպաստեն, որպեսզի կուսակցությունները լինեն ֆինանսական առումով առավել թափանցիկ և հաշվետու: