«Կարելի է գուշակել, թե դատավարության ժամանակ գերագույն գլխավոր ստախոսն ի՞նչ է հայտարարելու». Ռոբերտ Մարգարյան

Քաղաքագետ-իրավաբան Ռոբերտ Մարգարյանը ֆեյսբուքյան իր էջում գրել է. «ԱԱԾ տնօրենի նախկին ժամանակավոր պաշտոնակատար Միքայել Համբարձումյանը հաստատել է, որ իր պաշտոնավարության շրջանում ՀՀ վարչապետից ստացել է անօրինական հանձնարարական, որը «գտել է չպետք է կատարել»:

Ըստ որոշ տեղեկությունների՝ որոնք, ի դեպ, չեն հերքվել, ԲՀԿ առաջնորդ Գագիկ Ծառուկյանի հետ հանդիպման ժամանակ ՀՀ վարչապետը հայտնել է, թե հանձնարարել է կարճել նրա դեմ հարուցված մի շարք քրեական գործեր: Եվ այս շարանը, իհարկե, սրանով չի ավարտվում:

Իսկ ՀՀ վարչապետի աթոռին սոսնձված գերագույն գլխավոր ստախոսն Ամանորի գիշերը, նայելով ժողովրդի աչքերի մեջ ու ստելով, կրկին խոսել է «վստահելի դատական համակարգ» ստեղծելու մասին:

Նույն ստախոսը դեռ 2018 թվականի մայիսին իր ֆեյսբուքյան լայվերից մեկում հայտարարել էր, որ «Բաղրամյան 26-ից դատարաններին ուղղված հրահանգներ չեն լինելու»:

Իհարկե, արդեն կարելի է գուշակել, թե իր մոտալուտ դատավարության ժամանակ դատական համակարգին չմիջամտելու իր հայտարարության մասին գերագույն գլխավոր ստախոսն անմեղսունակի տեսք ընդունելով ի՞նչ է հայտարարելու:

«Չէ, ես էդպես չեմ ասել: Ես ասել եմ՝ Բաղրամյան 26-ից դատարաններին ուղղված հրահանգներ չեն լինելու: Բայց արդյոք Բաղրամյան 26-ից զանգեր լինո՞ւմ են: Ես Բաղրամյան 26-ո՞ւմ եմ: Իմ գրասենյակը վաղուց Բաղրամյան 26-ում չէ»»: