«Վահան Բադասյանի կյանքը վտանգված է»․ Արա Պապյան

«Օրենքը մի քանի հատկություն պիտի ունենա․ դրանցից մեկը բոլորի հավասարությունն է օրենքի առաջ»,- այսօր ՀՀ Գլխավոր դատախազության մոտ ի պաշտպանություն Վահան Բադասյանի ակցիայի ժամանակ հայտարարեց դիվանագետ Արա Պապյանը՝ հավելելով, որ Բադասյանին կալանավորել են մի արտահայտության համար, որը շատերն են արել։

Հիշեցնենք՝ նա հայտարարել էր․ «Նիկոլ Փաշինյանին պետք է հեռացնենք որպես թշնամի՝ ընդհուպ ֆիզիկապես, նաև զենքի միջոցով»:

«Նման մտքեր արտահայտել են շատերը, թիրախավորվել է միայն պարոն Բադասյանը։ Այստեղ հստակ քաղաքական հետապնդման երանգ կա։ Եթե դա ընկալվում է սպառնալիք, հստակ պիտի հասկանանք՝ այդ սպառնալիքը, խոսքը իրականանալու ինչպիսի հնարավորոթյուն ուներ։ Իհարկե, մենք հասկանում ենք, որ որևէ նման միտում չի եղել»,- ասաց Արա Պապյանը։

Նրա խոսքով՝ Բադասյանի խափանման միջոցը սխալ է ընտրված․ «Վահան Բադասյանը, որ բազմաթիվ վիրավորումներ է ստացել իր հայրենանվեր պայքարի հետևանքով, այսօր գտնվելով անազատության մեջ, իր կյանքը վտանգված է։ Խափանման միջոցը կարելի է փոխել, ի՞նչ խնդիր կա»,- ասաց նա՝ կոչով դիմելով իշխանությանը: