«Հայաստանում հանրային տրամադրությունների քարտեզն էապես փոխվել է». Հակոբ Բադալյան

Քաղաքական մեկնաբան Հակոբ Բադալյանը ֆեյսբուքյան իր էջում գրել է. «Կա՞ արտահերթ ընտրության հանրային պահանջ, թե՞ չկա: Էս մի քիչ նման է բաժակի կիսով չափ լիքը կամ կիսով չափ դատարկ լինելու պատմությանը: Իհարկե, հանրային զգալի շերտեր կան, որ ունեն արտահերթ ընտրության պահանջ և ակնկալիք, ու կան շերտեր, որոնք չունեն էդ պահանջը: Արտահերթ ընտրության խնդիրը հանրային պահանջի լինել-չլինելով պայմանավորելն անշուշտ քաղաքական թիմերի մարտավարական շրջանակից է: Արտահերթ ընտրության խնդիր կա, որովհետև Հայաստանում հանրային տրամադրությունների քարտեզն էապես փոխվել է, ըստ այդմ՝ առաջացել է խորհրդարանում նոր ստատուս-քվո արտացոլելու, կամ նոր ստատուս-քվո արտացոլող խորհրդարան ունենալու անհրաժեշտություն, որպես քաղաքական կայունության գրավական: Ամբողջ հարցը թերևս այն է, որ արտահերթ ընտրությունն այդ հարցը կլուծի, եթե լինի բոլոր քաղաքական ուժերի (մարդ կուսակցությունները, բնականաբար, չհաշված) փոխհամաձայնությունն այդ առնչությամբ: Այսինքն՝ ընտրական գործընթացը դիտարկվում է լուծում և ընդունվում, անկախ արդյունքից: Եթե այդ լայն փոխհամաձայնությունը չկա, իսկ դա հիմա չկա, և մի շարք պատճառներով, արտահերթ ընտրությունը չի լուծի գլխավոր՝ կայունության հարցը»: