«Անբարոյականության և անամոթության մաստեր կլաս էր». Արծվիկ Մինասյան

Ինչպես արդեն հայտնել էինք, «Հայրենիքի փրկության շարժման» անդամները գիշերն անցկացրել են Բաղրամյան պողոտայում: Այսօր լրագրողների հետ զրույցում ՀՅԴ ԳՄ անդամ Արծվիկ Մինասյանն անդրադարձավ վարչապետ Փաշինյանի հրավիրած երեկվա հանրահավաք-երթին.

«Նողկանք կարելի է ապրել, երբ իր պատճառով զոհվածի հարազատին է գրկում և փորձում ինչ-որ բաներ վերագրել այն հատվածի ժողովրդին, որը պահանջում է իր հրաժարականը: Սա խայտառակություն է: Մենք գործ ունենք մի մարդու հետ, որի մեջ մարմնացած է ամբողջ չարությունը, ամբողջ սատանայական վարվելակերպը իր ժողովրդի, պետության հանդեպ»,- ասաց Մինասյանը:

Անդրադառնալով Փաշինյանի հայտարարությանը, թե «վերջ է տրվելու թավիշին», Մինասյանն ասաց. «Ի՞նչ թավիշ, ի՞նչ փաթուսխա: Ինքն ամեն օր է իրականացնում բռնություն կամ դրա փորձ: Ընդ որում այդ փորձերը միայն ֆիզիկական չեն, նաև հոգեբանական են, նաև այն տեռորի միջավայրն է, որ ինքը ստեղծել է: Ի՞նչ է նշանակում՝ թավիշը վերացնում ենք, բա էսքան ժամանակ ի՞նչ էր. էն որ «շնաբարո դուրսպրծուկներ» գնահատականն էր տալիս, հարձակում էր կազմակերում դատական իշխանության, ընդդիմադիր գործիչների վրա, իրեն քննադատող քաղաքացիներ վրա: Բա դրանք ի՞նչ էին, փաստորեն այդ ամենը թավիշ էր, իսկ հիմա մենք սպասում ենք ոչ թավիշի՞ն»: