«Զոհված զինծառայողի հորը Փաշինյանն ամեն ամիս փոխանցում է զոհված որդու արյան գինը». Նաիրա Զոհրաբյան

168 TV-ի «Ռեվյու» հաղորդաշարի եթերում ԱԺ ԲՀԿ պատգամավոր Նաիրա Զոհրաբյանն անդրադարձել է երկրում ստեղծված ներքաղաքական ճգնաժամին և խոսել ՀՀ վարչապետ Նիկոլ Փաշինյանի նկատմամբ ժողովրդի վստահությունից։

«Փաշինյանի որևէ խոսքի չեմ հավատում։ Նա խաբում է բոլորին և փորձում ժամանակ ձգել, ես իրեն կատեգորիկ չեմ հավատում: Փաշինյանին հաջողվում է շնորհիվ մանիպուլյացիոն կոդերի՝ ժամանակ շահել։ Այն, ինչ նա անում է, ապաքաղաքական է, բայց քանի դեռ հանրության մեջ կա մի փոքր, բայց ագրեսիվ հատված, որը շարունակում է հավատալ Փաշինյանի ստերին, նա շարունակելու է խաբել»,- ասել է Զոհրաբյանը՝ նշելով, որ ընդունում է նաև այն տեսակետները, որ նրան դեռ հավատացող կա. «Օրինակ՝ Գյումրիում հանդիպեցի մի մարդու, որի 19-ամյա որդին զոհվել է այս պատերազմում, բայց նա երջանիկ էր. ինչո՞ւ, որովհետև ամեն ամիս Նիկոլը փոխանցում է զոհված զինծառայողի հորը զոհված զինվորի արյան գինը։ Ես կրկնում եմ՝ Նիկոլի ֆենոմենը քննարկել եմ աղանդների հետ աշխատող հոգեբանների հետ. նրանք ևս պնդում են, որ Նիկոլն աշխատում է այնպես, ինչպես սեկտաների հետ են աշխատում, և հենց դրա շնորհիվ էլ կարողանում է մանիպուլյացնել»,- ասաց Զոհրաբյանը։