Անհետ կորած ու գտնված զինվորներից մեկը ջրանցքից խեղդվող ընկերներին փրկած 10-ամյա Արմենի հայրն է

Մարտի 21-ին անհետացած ու ընդամենը ժամեր առաջ գտնված պայմանագրային երկու զինծառայողներից մեկի՝ Կարեն Շահնազարյանի կինը՝ Ագապին, համացանցից է իմացել, որ ամուսինը կորել է: Իսկ գտնվելու մասին տեղյակ են պահել ամուսնու բարեկամները, որոնք այս ընթացքում հազար ու մի տեղ են դիմել պայմանագրային Շահնազարյանի գտնվելու վայրը ճշտելու համար:

«Հայկական ժամանակի» հետ զրույցում Ագապին պատմել է, որ վերջին անգամ ամուսնու հետ խոսել էր երեկ՝ մարտի 21-ի, վաղ առավոտյան: «Ասաց, որ ուժեղ բուք է, վատ եղանակ: Մի պոստից մեկ այլ պոստ էր գնացել: Հետո որ ահագին անցավ, չզանգեց, ես զանգեցի, բայց անհասանելի էր: Նրա հետ կորած ծառայակիցը՝ Աղասի Հովհաննիսյանն էլ Արագածավանից է, ճանաչում ենք»,- ասել է Ագապին:
Նրա խոսքով՝ ամուսինն ու ծառայակից ընկերը մոտ 34 ժամ դրսում են եղել, ցրտահարվել են: «10 տարուց ավելի է՝ ծառայում է, երբևէ որևէ փորձանքի մեջ չէր ընկել: Երկու պատերազմ տեսավ, ոչինչ չեղավ ու հանկարծ սա»,- նշել է կինը:

37-ամյա Կարեն Շահնազարյանը նախկինում Քարվաճառում է ծառայել, տվյալ տարածքն Ադրբեջանին անցնելուց հետո տեղափոխվել է Ջերմուկի զորամաս:

Նկատենք՝ Կարեն Շահնազարյանը Թալինի ջրանցքում խեղդվող ընկերների կյանքը փրկած 10-ամյա Արմենի հայրն է: