«Մեկ ժամ էինք տվել ադրբեջանական կողմին, որ գերեվարված 6 զինծառայողներին վերադարձներ»․ ԶՈւ ԳՇ պետի տեղակալ

ԶՈւ ԳՇ պետի տեղակալ Էդվարդ Ասրյանը այսօր՝ ՊՆ-ում տեղի ունեցած մամուլի ասուլիսի ժամանակ, անդրադարձավ Գեղարքունիքում գերեվարված վեց հայ զինծառայողների դեպքին՝ ներկայացնելով մանրամասներ։

Ասրյանը հայտնեց, որ զինծառայողների խումբն ունեցել է աջակցման խումբ, կառավարման խումբ, և խնդրի կատարման խումբ։

«Բոլոր նշվածները չեն գերեվարվել, այսինքն՝ եթե 6 զինծառայող է գերեվարվել , դա չի նշանակում, որ խումբը բաղկացած էր 6 հոգուց։ Խումբն ավելի մեծ էր, սակայն գործողությունների անմիջական շրջանում գտնվում էին 4 զինծառայող, որոնք անմիջական խնդիր էին կատարում, իսկ երկուսը, կառավարման խմբի մեջ մտնող, մոտեցել էին՝ բանակցություններ վարելու։ Այսինքն՝ պատկերացնում էին, որ կլուծվեր նույն ճանապարհով, բայց հակառակորդը գործել է այլ կերպ՝ դավադրաբար, և մեր տարածքում՝ պետական սահմանից 800 մետր խորության վրա, շրջափակել և գերեվարել մեր 6 զինծառայողներին»,- ասաց Ասրյանը։

Հարցին՝ գերեվարվել են, թե առևանգվել, Ասրյանը պատասխանեց․« Առևանգելը զինվորական տերմինաբանության մեջ չի մտնում»։

ԶՈւ ԳՇ պետի տեղակալը նշեց, որ ադրբեջանական կողմին սկզբում մեկ ժամ է տրվել, հայ զինծառայողներին վերադարձնելու համար։

«Մեր նշած առաջին ժամկետը լրացել է։ Մեկ ժամն անցնելուց հետո մեզ հետ կապ են հաստատել ռուս գործընկերները, որոնք Ստեփանակերտում են, և ներկայացրել, որ Բաքվում անցկացնում են խորհրդակցություն և քննարկում գերիների վերադարձման հարցը, դրա համար մենք մեկ ժամը լրանալուց հետո համապատասխան գործողությունների չենք գնացել»,- ասաց Ասրյանը՝ նշելով, որ եթե հակառակորդը հայկական կողմի ներկայացրած պայմանները չկատարի, ապա մշակվում են համապատասխան պլաններ։