«Կրո՞ւմ եք քաղաքական պատասխանատվություն ձեր՝ իշխող խմբակցության անդամ եղած ժամանակաշրջանի համար»․ Ռուբինյանը՝ Թովմասյանին

«Պատիվ ունեմ» և «Հայաստան» խմբակցություններն ԱԺ «Մարդու իրավունքների պաշտպանության և հանրային հարցերի մշտական հանձնաժողովի» թեկնածուի պաշտոնում առաջադրել են «Պատիվ ունեմ» խմբակցության պատգամավոր Թագուհի Թովմասյանի թեկնածությունը։ Այսօր՝ ԱԺ նիստի ժամանակ, ԱԺ փոխնախագահ Ռուբեն Ռուբինյանը, դիմելով Թագուհի Թովմասյանին, հարցրեց․ «Արդյոք դուք կրո՞ւմ եք քաղաքական պատասխանատվություն ձեր՝ իշխող խմբակցության անդամ եղած ժամանակաշրջանի համար՝ իր բոլոր արդյունքներով հանդերձ»։

Ի պատասխան Թովմասյանն ասաց․ «Ես կրում եմ պատասխանատվություն իմ բոլոր քայլերի և նրանց հետևանքների համար, բայց ես սովոր եմ պատասխանատվություն կրել այն բանի համար, ինչից տեղյակ եմ, իսկ դուք շատ լավ գիտեք, որ հատկապես պատերազմական իրավիճակում և դրանից հետո խմբակցությունը կամ գոնե ես տեղյակ չեմ եղել իշխանության որևէ գործողության մասին»։