«Բանակցային գործընթացը ֆեյք էր, բլեֆ». Փաշինյան

ԱԺ-ում հարցուպատասխանի ժամանակ վարչապետ Նիկոլ Փաշինյանը պարզաբանեց՝ ինչու է բանակցային գործընթացը որակել որպես ֆեյք գործընթաց: «Պատճառն այն է, որ բանակցային ամբողջ գործընթացը, որի վրա էդքան հղում եք անում, եղել է Լեռնային Ղարաբաղն Ադրբեջանի կազմում թողնելու վերաբերյալ: 1998 թվականից Լեռնային Ղարաբաղը դուրս է թողնվել բանակցային սեղանից: 1999 թվականին Հաայաստանի Հանրապետությունն ընդունել է կոնսեսուսի շրջանակներում Եվրոպայում անվտանգության խարտիան, որտեղ ասվում է հետևյալը: Մարդու իրավունքների՝ ներառյալ ազգային փոքրամասնություններին պատկանող անձանց նկատմամբ լիարժեք հարգանքը, բացի այն բանից, որ դա ինքնին նպատակ է, չպետք է խաթարի, այլ ընդհակառակը, ամրապնդի տարածքային ամբողջականությունն ու ինքնիշխանությունը: Ինքնավարության տարբեր հայեցակարգերը, ինչպես նաև վերոհիշյալ փաստաթղթերում նշված այլ մոտեցումներ, որոնք համապատասխանում են ԵԱՀԿ սկզբունքներին, ազգային փոքրամասնությունների էթնիկ լեզվական և կրոնական ինքնության պաշտպանության և խթանման միջոցներ են գոյություն ունեցող պետության ներսում: Հաջորդը, երբ որ այդ նույն 99 թվականից հետո 2000-ականներին ՀՀ-ը ԼՂ հարցի կարգավորման համատեքստում քննարկել է տարածքների փոխանակման բանաձևը և առաջարկել է, որ Մեղրիի շրջանը հանձնի Ղարաբաղն ստանալու դիմաց, սրանով ամբողջացել է, որ Հայաստանի Հանրապետությունը 3 քայլանի գործողությամբ Լեռնային Ղարաբաղը ճանաչել է որպես Ադրբեջանի մաս: Սա է պատճառը, որ ես այդ բանակցային գործընթացն անվանել եմ ֆեյք, որովհետև այս նույն իշխանության ներկայացուցիչները նույն համոզվածությամբ ասում են՝ այսպես պետք է լիներ, այնպես պետք է լիներ: Էդ ամեն ինչը բլեֆ է, չի եղել այդպիսի բան»: