«Վստա՞հ եք, որ Ադրբեջանը մեր օդային տարածքով ահաբեկիչներ չի տեղափոխում Նախիջևան». Ղազինյանը՝ ՊՆ փոխնախարարին

«Պն-ն տեղեկացվա՞ծ է Քաղաքացիական ավիացիայի գլխավոր վարչությունից, թե ինչ հիմունքով են ադրբեջանական ինքնաթիռները հատում ՀՀ օդային սահմանը, վայրէջք կատարում Նախիջևանում, ապա վերադառնում էլի Բաքու։ Տեղյա՞կ եք, թե ինչեր են տեղափոխում»,- այսօր՝ ԱԺ պաշտպանության և անվտանգության հարցերի հանձնաժողովի նիստի ժամանակ, դիմելով ՊՆ փոխնախարար Արման Սարգսյանին, հարցրեց «Հայաստան» խմբակցության պատգամավոր Արթուր Ղազինայնը։

«Անձամբ ես մանրամասներին տեղյակ չեմ՝ ինչ ընթացակարգերով է իրականացվում։ Կարող եք դիմել Քաղավիացիայի կոմիտե, պարզաբանումներ կներկայացնեն»,- պատասխանեց Սարգսյանը։

Հարցին, թե ՊՆ-ն վստահ է, որ Ադրբեջանը ՀՀ օդային տարածքով ահաբեկիչներ չի տեղափոխում Նախիջևան, փոխնախարարը ոչինչ չպատասխանեց։