«Փաստորեն նոյեմբերի 9-ի պայմանավորվածություններն Ալիևին այլևս չեն հետաքրքրում». Նարինե Դիլբարյան

Հայոց լեզվի պատմության ամբիոնի դոցենտ Նարինե Դիլբարյանի գրառումը. «Փաստորեն Իլհամ Ալիևը Հայաստանի հետ «առանց նախապայմանների» հարաբերությունների կողմնակից դարձած Թուրքիայի հետ Բրյուսելում հերթական պահանջատիրությունն է ձևակերպել, Մեղրին և Քաշաթաղը (թրքացված տարբերակով Լաչինը) դրել են իրենց օրակարգում՝ իբրև թե իրենք «Լաչինի միջանցք» են տվել մեզ, փաստորեն այդպես մեծահոգի են, կարող էին չտալ, այժմ մենք իրենց «Մեղրիի միջանցք» պիտի տրամադրենք: Ախորժակն ուտելիս է բացվում, ինչ ուզեցին, հաջողեցին մեր անկար, անգաղափար անկազմակերպվածության պատճառով, այժմ հասել են Բրյուսել և իբրև թուրք-ադրբեջանական ահաբեկչության նոր քայլ հույս ունեն լիովին կլանել Արցախը և Սյունիքը՝ նախիջևանացելով դրանք՝ էթնիկ զտումներ, մշակութային և պատմական ցեղասպանության շարունակություն: Փաստորեն նոյեմբերի 9-ի պայմանավորվածություններն Ալիևին այլևս չեն հետաքրքրում, մեծ եղբայր Թուրքիան ասել է՝ չեղարկում ենք, սկսում համաթուրքական էջից: Ուստի մենք պետք է առաջ մղենք հայկական օրակարգը՝ Քաշաթաղը չի կարող լինել ադրբեջանական որևէ վերահսկողության ներքո, այդ խնդիրն ընդհանրապես կապ չունի տարածաշրջանային կոմունիկացիաների բացման հետ: Արցախն ունենալու է ուղիղ և օտարի կողմից չվերահսկվող սահման Հայաստանի հետ, Արցախի բռնազավթված հայկական տարածքները վերադարձվելու են: Հայաստանն իր ինքնիշխան տարածքում երբևէ միջանցք չի տրամադրելու բռնազավթված հայկական Նախիջևանն Ադրբեջանին միացնելու համար»: