«Աշխատավարձ ստացողներն ի վիճակի չեն իրենց նվազագույն սպառողական զամբյուղով ապահովել». Ոսկան Սարգսյան

Լրագրող Ոսկան Սարգսյանի գրառումը. «ԱՇԽԱՏՈՂՆ ԱՇԽԱՏԱՎԱՐՁՈՎ ՉԻ ԿԱՐՈՂ ԻՐԵՆ ՆԱՎԱԶԱԳՈՒՅՆ ՍՊԱՌՈՂԱԿԱՆ ԶԱՄԲՅՈՒՂՈՎ ԱՊԱՀՈՎԵԼ

Ըստ ՀՀ վիճակագրության պետական կոմիտեի՝ 2021թ․ 3-րդ եռամսյակի տվյալներով Հայաստանում նվազագույն սպառողական զամբյուղը կազմել է 70 հազար դրամ։ Հայաստանում նվազագույն աշխատավարձը 68 հազար դրամ է, այսինքն՝ նվազագույն աշխատավարձ ստացողները իրենց ռոճիկով ի վիճակի չեն իրենց նվազագույն սպառողական զամբյուղով ապահովել։ Այս պայմաններում չգիտես՝ ինչ հաջողությունների և ձեռքբերումների համար պետական բյուջեից պաշտոնյաները ճոխ պարգևատրվում են։ Տավուշի մարզպետարանի աշխատողները այս տարվա 10 ամիսներին պարգևատրվել են 68 միլիոն դրամի չափով, ԱԺ պատգամավորները և աշխատակազմը, կառավարության աշխատողները պետբյուջեից պարբերաբար պարգևատրվում են։ Իր մանկահասակ երեխային Երևան վիրահատելու տանող, սոցիալապես անապահով, ընտանեկան նպաստ ստացող կինն օրերս ֆինանսական օգնության խնդրանքով դիմել էր Տավուշի մարզպետարան։ Տավուշի մարզպետարանի համապատասխան հանձնաժողովը հարցը քննելով՝ տրամադրել էր ընդամենը 30 հազար դրամի չափով աջակցություն։ Տավուշի մարզպետարանի աշխատողները պետական բյուջեից ճոխ պարգևատրվում են, իսկ կարիքավորին օգնելու համար քծիպություն են անում, կուշտը սովածին մանր է բրդում»։