«Փաշինյանի հանձնարարությամբ՝ Մարուքյանի ղեկավարած կառույցն ու դատարանը մասնակից են այս հանցագործությանը». Արսեն Բաբայան

«Հայրենիք» կուսակցության անդամ Արսեն Բաբայանը լրագրողների հետ զրույցում անդրադառնալով Վանաձորի ավագանիում ստեղծված իրավիճակին, ասել է. «Իշխանությունը գողանում է իշխանությունը Վանաձորում. Փաշինյանի ուղիղ հանձնարարությամբ, մշտական հաճախորդ Էդմոն Մարուքյանի ղեկավարած կառույցն ու դատարանը մասնակից են դառնում այս հանցագործությանը. ժողովուրդը ընտրել է մեկ անձի, բայց փորձում են գողանալ այդ իշխանությունը, որպեսզի իրենց ուզած մարդուն բերեն, դարձնեն քաղաքապետ»:

Այսօր՝ դեկտեմբերի 24-ին նախատեսված էր Վանաձորի ավագանու անդրանիկ նիստը, սակայն այն չկայացավ. համայնքի աշխատակազմի քարտուղարի ժամանակավոր պաշտոնակատար Դավիթ Հակոբյանն ընթերցեց վերաքննիչ վարչական դատարանի որոշումը, որը «Լուսավոր Հայաստան» կուսակցության հայցի հիման վրա միջանկյալ միջոց էր կիրառել, որով արգելվում է Վանաձորի ավագանուն այս ընթացքում ավագանու նիստ հրավիրել համայնքապետ ընտրելու օրակարգով:

Ինչպես արդեն տեղեկացրել էինք, «Լուսավոր Հայաստան» կուսակցությունը դիմել էր դատարան՝ ընտրությունների արդյունքները վիճարկելու պահանջով։

Հիշեցնենք, որ դեկտեմբերի 5-ին տեղի ունեցած ՏԻՄ ընտրությունների արդյունքներով առաջատար է «Մամիկոն Ասլանյան» կուսակցությունների դաշինքը:

Հիշեցնենք նաև, որ Մամիկոն Ասլանյանը կալանավորված է: