«Մենք անընդհատ մերժելու ենք մեր նախորդներին՝ Տիգրան Մեծից մինչև մեր օրեր»․ Սենոր Հասրաթյան

Արցախի ՊԲ նախկին խոսնակ Սենոր Հասրաթյանը ֆեյսբուքյան իր էջում գրել է․ «Մենք հայտնվել ենք համազգային տառապանքի տանող մի ալեպտույտի մեջ, որից դուրս գալու ելքը պայմանավորված է ոչ թե անհատի, այլ մտածող անհատների առաջնորդությամբ ժողովրդին իմի բերելու և նրան նորից սեփական ինքնությանը հասու դարձնելու օրապահանջ անհրաժեշտությամբ... Մենք չենք փրկվելու անընդհատ, անպատասխանատու և անհասցե վիրավորանքների հեղեղից, քանի դեռ դրանց հիմքում ընկած է ազգայինը մերժող և «համամարդկայինն» ընդունող անդեմ ու անպատասխանատու պատահականությունների հավաքածուն... Մենք անընդհատ մերժելու ենք մեր ՆԱԽՈՐԴՆԵՐԻՆ՝ Տիգրան Մեծից սկսած մինչև մեր օրեր, քանի դեռ հավակնում ենք արդարացնել այն, ինչ ունենք իշխանության ղեկը վարող այսօրվա անկարողների ապաշնորհության արդյունքում...
Հ.գ.- Հիշեցնեմ, որ ուղիղ 29 տարի առաջ այս օրը՝ փետրվարի 5-ին, երբ թշնամին գրավել էր նորանկախ Արցախի Հանրապետության գրեթե կեսը, հայկական ինքնապաշտպանության ուժերի կողմից ձեռնարկված լայնածավալ հակահարձակողական գործողությունների արդյունքում ազատագրվեց Մարտակերտի, Ասկերանի, Մարտունու և Հադրութի շրջանների բռնազավթված տարածքների մեծ մասը և հնարավորություն ստեղծվեց հետագա հաջողությունները զարգացնելու համար... Դա հնարավոր դարձավ, քանի որ ունեինք ազգայինը պահելու վճռականի հոգեբանություն...»։