«Պետական դրոշի և այլ խորհրդանիշների հանրայնացումն ունի կարևոր նշանակություն, բայց...». Հակոբ Բադալյան

Քաղաքական մեկնաբան Հակոբ Բադալյանի գրառումը. «Հայաստանի խորհրդարանում քննարկվում է պետական դրոշի հանրայնացման աստիճանի բարձրացմանն ուղղված օրենքի նախագիծ, կարծես թե, ընդդիմության նախաձեռնությամբ: Պետական դրոշի և, իհարկե, պետական այլ խորհրդանիշների, պետականության թե՛ ինստիտուցիոնալ, թե՛ արժեհամակարգային, թե՛ խորհրդանշանային բաղադրիչների հանրայնացումն ունի կարևոր նշանակություն:

Այդ ամենով հանդերձ, կարծում եմ այդ խնդրի լուծման հիմնարար, խորքային և մնայուն միջոցը տվյալ պետության մեջ կյանքի որակի բարձրացումն է, հանրային համակեցության միջավայրի, պետական կառավարման վերափոխումը: Պետականության իրողությունն այդ դեպքում է վերածվում տվյալ պետության քաղաքացու զգացումի և մտածողության, հետևաբար նաև զգայական և գիտակցական խորքում ձևավորում այդ պետության խորհրդանիշների հանդեպ բազմաշերտ «պահանջարկ»: Այլապես, ընկալումը հիմնականում կմնա լոկ «հուշանվերի» մակարդակի, ինչպես զբոսաշրջիկների մոտ»: