«Կարծում եմ՝ Ռուսաստանի իշխանությունն ընթացիկ օրակարգում չունի «միութենական պետության» նպատակ». Հ. Բադալյան

Քաղաքական մեկնաբան Հակոբ Բադալյանի գրառումը. ««Միութենական պետության» այսպես կոչված գաղափարը իհարկե Ռուսաստանի մեծ ցանկությունն է: Դե, հասկանալի է, ո՞ր մի կայսրությունը կամ մեծ տերությունը չունի այդպիսի վերադասության ցանկություն՝ ըստ իր «կարդացածության» կամ «այլասերվածության» աստիճանի: Այլ է հնարավորությունների հարցը: Ընդ որում, հնարավորություն ասվածը միայն փողը կամ տնտեսական կարողությունները չեն, այլ շրջապատի հետ ռազմա-քաղաքական հարաբերությունն ու հարաբերակցությունը:
Այդ առումով, կարծում եմ՝ Ռուսաստանի իշխանությունն ընթացիկ օրակարգում չունի «միութենական պետության» նպատակ, որպես այդպիսին: Գուցե ունի «տեսլական», սա այլ հարց է: Միաժամանակ, այդ «գաղափարը» շրջանառվում է քաղաքական, քաղաքագիտական, փորձագիտական և իհարկե նաև «սատելիտական» շրջանակների միջոցով՝ տարբեր նշանակության հարցեր լուծելու համար:
Մասնավորապես, կովկասյան ուղղությամբ այդ «գաղափարի» շրջանառումը կարծում եմ տեսանելի հեռանկարում չունի այլ իմաստ, քան Թուրքիայի հետ «սակարկության» դաշտ, տարածություն բացելը կամ ընդլայնելը: Այդ իմաստով հատկանշական է, որ օրինակ հայաստանյան ուղղությամբ էլ թեման աշխուժացվում է ուկրաինական ուղղությամբ ճգնաժամի ֆոնին, որտեղ Թուրքիան համառորեն փորձում է միջնորդական նախաձեռնության հավանություն ստանալ Ռուսաստանից:
Գործնական իմաստով, «միութենական պետություն» ասվածի առնչությամբ Ռուսաստանն այս ռեգիոնում համենայն դեպս դեռևս հեռու է գործնական նպատակադրումներից: Կրկնեմ, ոչ թե ցանկության, այլ հնարավորությունների և բավարար հանգամանքների բացակայության պատճառով:
Ըստ այդմ, հայկական հանրությանն էլ թերևս արժե այս պարագայում «հողմաղացի» դեմ կռվի փոխարեն, կենտրոնանալ առավել առարկայական, առօրեական և ռազմավարական խնդիրների «գույքագրման», ախտորոշման և լուծումների մշակման հարցով, թե ներքին տնտեսական ու հասարակական-քաղաքական, թե արտաքին ու անվտանգության ոլորտներում»: