«Ռուսաստանի ռազմական գործողությունն իրականացվելու է «Ուկրաինայի գրոհի» պատասխան սցենարով». Հակոբ Բադալյան

Քաղաքական մեկնաբան Հակոբ Բադալյանի գրառումը․ «Դոնբասի ինքնահռչակ հանրապետության ղեկավարը հայտարարել է դեպի Ռուսաստան բնակչության կազմակերպված զանգվածային տարհանման մասին: Դոնեցկում միացել է բնակչության ազդարարման շչակը: Ըստ ինքնահռչակ հանրապետության ղեկավարի՝ Ուկրաինայի նախագահ Զելենսկին առաջիկայում ուկրաինական զինուժին կտա գրոհի հրաման:

Ինչպես բազմիցս ասել եմ, Ռուսաստանի ռազմական գործողությունն իրականացվելու է «Ուկրաինայի գրոհի» պատասխան սցենարով: Սրա մասին, իհարկե, խոսում են գործնականում բոլորը: Մեղմ ասած, մոլորություն է մտածել, թե Ռուսաստանը երբևէ արտահայտելու էր նախահարձակ լինելու մտադրության մասին: Որևէ երկիր չի արտահայտում իր հարձակման մտադրությունը: Միաժամանակ, էվակուացիան, իհարկե, դեռ անխուսափելի մասշտաբային պատերազմի վկայություն չէ, կարող է լինել քաղաքական մանևր՝ լարվածության աստիճանը մեծացնելու միջոցով դիմացինին զիջման մղելու համար: Դիմացինն այստեղ Ուկրաինան է, թե Արևմուտքը, բավականին բարդ է ասել: Համենայն դեպս հատկանշական է, որ Դոնբասի էվակուացիան իրականացվում է նաև միջուկային ռազմավարական սպառազինության արձակման զորավարժության մասին հայտարարությանը զուգահեռ, որ արել է Մոսկվան: Ասել, որ ռեզինը չունի այլևս ձգելու տեղ (նկատի ունեմ քաղաքական գործընթացը), թերևս այդպես չէ, բայց թերևս մնացել են «միլիմետրեր»»: