«Պետությունը սկսվում է քաղաքականությունից և վերջանում է քաղաքականությամբ». Գ. Միսկարյան

«Քաղաքացու որոշում» ՍԴԿ նախկին անդամ Գարեգին Միսկարյանի գրառումը. «Ցանկացած գործողություն կատարելու համար (առավել ևս զարգանալու համար) դուք պետք է կարողանաք անել երկու բան՝ որոշում կայացնել և այս կամ այն կերպ իրագործել, կյանքի կոչել այդ կայացրած որոշումը։
Որոշում կայացնում եք ելնելով ձեր կարիքներից, որոնք սակայն խորապես հենվում են ձեր արժեքների վրա, իսկ արդեն կայացրած որոշումը իրականություն դարձնելիս դուք օգտվում եք, ելնում եք ձեր հմտություններից, գիտելիքներից։
Այդպես է նաեւ պետականության դեպքում։ Որոշումները կայացվում են արժեքներից ելնելով՝ դրանց ասում են քաղաքականություն (politics)։ Այդ որոշումները իրականացվում են մենեջերների միջոցով (policy), որը մենք նույնպես անվանում ենք քաղաքականություն և այդտեղ սկսվում է խառնաշփոթը։
Լավ մենեջեր (օրինակ հաջողակ բիզնեսմեն) լինելը բավարար չի ճիշտ քաղաքական գործիչ լինելու համար, եթե դու արժեքային մակարդակում կողմնորոշված, ինքնորոշված չես։ Եվ լավ քաղաքկան միտք ունենալը բավարար չի գաղափարը հաջող իրականացնելու համար, եթե դու համապատասխան գիտելիքների չես տիրապետում։
Հաջողել են այն ժողովուրդները, այն սերունդները, որոնք կարողացել են երկուսի՝ politics (որոշում կայացնողների) և policy (իրականցնողների) հաջող համադրություն ստանան։
Դրա համար, երբ ասում եք՝ մեզ պետություն ունենալու համար պետք են բիզնեսմեն ղեկավարներ, մեզ պետություն ունենալու համար պետք են գիտնականներ, հաշվի առեք այս առանձնահատկությունը.
Պետությունը սկսվում է քաղաքականությունից (politics) և վերջանում քաղաքականությամբ (policy)»: