«Եթե Քոչարյանը և Սարգսյանը պետք է դատվեն, ապա նրանց պետք է դատի միայն ՀՀ դատարանը». Վ. Մարտիրոսյան

Zangi-ի հիմնադիր Վահրամ Մարտիրոսյանը ֆեյսբուքյան իր էջում գրել է. «Ադրբեջանը հետախուզում է հայտարարել Ռոբերտ Քոչարյանի և Սերժ Սարգսյանի նկատմամբ։
Ճիշտ է, իրենց նախագահության տարիներին մենք ունեցել ենք կոռումպացված երկիր և կեղծված ընտրություններ, բայց ամեն դեպքում նրանք ՀՀ քաղաքացիներ են և ինչքան էլ շատերը նրանց չսիրեն, միևնույն է և՛ Ռոբերտ Քոչարյանը, և՛ Սերժ Սարգսյանը Ադրբեջանին հա՛ղթած հրամանատարներ են։
Հուլիոս Կեսարին հաճոյանալու համար Եգիպտացիները գերեվարվում և գլխատում են Կեսարի քաղաքական հակառակորդ Պոմպիոսին։ Երբ Կեսարին են մատուցում տուփի մեջ դրված Պոմպիոսի գլուխը, նրանք հանկարծակիի են գալիս Կեսարի արցունքներից ու զայրույթից։ Արդյունքում Կեսարը գլխատում է Պոմպիոսի սպանության մասնակից բոլորին։ Ասելով հետևյալ խոսքերը՝ դուք ով եք, որ հռոմեական կոնսուլի ճակատագիր որոշեք։
Այ սա է պետական մտածելակերպը։ Թայֆեն ազգից նման հարցերում է տարբերվում, երբ դու պետք է լինես այնքան մեծահոգի, որ քո ամենաչսիրած հակառակորդի վնասը վեր չդասես ազգային ու պետական շահից։
Եթե Ռոբերտ Քոչարյանի և Սերժ Սարգսյանը պետք է դատվեն, ապա նրանց պետք է դատի միայն ՀՀ դատարանը։ Լավն էլ է մերը, վատն էլ է մերը»։