«Արևմուտքը պետք է հասկանա՝ տարածաշրջանում մեկ այլ սպառնալիք էլ կա՝ Էրդողանը»․ Նարինե Մկրտչյան

Մամուլի ազգային ակումբի նախագահ Նարինե Մկրտչյանի գրառումը․ «Միջուկային զենքը նախապատրաստական գործարկման բերելու և այն օգտագործելու՝ Պուտինի հաստատակամությանը դժվար է կասկածել: Եթե մի քանի օր Զելենսկին էր աշխարհում մենակ մնացել, այժմ Պուտինն է միայնակ մնացել: Պուտինն այժմ նաև հուսահատ է, իսկ հուսահատված մարդիկ շատ բանի են ընդունակ:
Պուտինը գիտե, որ այս պատերազմում նաև իր իշխանության հարցն է լուծվում:
Պատերազմը երկու կարևոր արդյունք պետք է ունենա՝ Պուտինի հեռացումն իշխանությունից և ԵՄ արտաքին քաղաքական ուղեգծի վերանայումը: (Այս երկրորդի մասին՝ այլ առիթով):
Միաժամանակ, Արևմուտքը պետք է հասկանա, որ մեր տարածաշրջանում մեկ այլ Պուտինն էլ կա, որը սպառնալիք է ոչ միայն տարածաշրջանի, այլև հենց Եվրոպայի համար: Թուրքիայի նախագահ Էրդողանն է այդ սպառնալիքը:
Եվրոպան թերագնահատել է Էրդողանի վտանգը՝ վստահ, որ թուրքական առաջարկները միշտ էլ գրավիչ են մնալու Եվրոպայի համար: Մինչդեռ այդ վտանգը մեծանում է այդ առաջարկներն ընդունելու հետևանքով: Մի օր այդ վտանգն անկանկալ պայթելու է Եվրոպայում:
Արևմուտքը չափազանցության է հասցրել այն ինքնահամոզմունքը, թե Թուրքիան ռուսական ազդեցության կասեցման և հակազդման կարևոր գործոն է տարածաշրջանում: Մինչդեռ ռուս-թուրքական աշխարհաքաղաքական շահերը վերջնահաշվարկում ավելի շատ համընկնում են, քան հակադրվում:
Թուրքիայի հետ կապված Արևմուտքը այլ մոլորություններ ևս ունի և այդ մոլորությունների հետևանքով Արևմուտքը մեծացնում է Թուրքիայի դերը Եվրոպայում: Թուրքիան միշտ վտանգավոր երկիր է եղել Եվրոպայի համար և մնում է այդպիսին, սակայն այն վտանգն էապես աճում է Թուրքիայի նախագահ Էրդողանի կառավարմամբ:
Արևմուտքը հիմա պայքարում է Մոսկվայի սպառնալիքի դեմ, բայց մյուս սպառնալիքը՝ Էրդողանի տեսքով, դեռ մնում է»: