#Cisco-ն դադարեցրել է գործունեությունը Ռուսաստանում և Բելառուսում

Ցանցային սարքավորումների ամերիկյան արտադրող Cisco Systems Inc-ը դադարեցրել է ողջ բիզնես գործունեությունը Ռուսաստանում և Բելառուսում ուկրաինական իրադարձությունների պատճառով: Cisco-ն կենտրոնանալու է Ուկրաինայում իր աշխատակիցներին, հաճախորդներին և գործընկերներին աջակցելու վրա, ինչպես նաև տրամադրելու է մարդասիրական օգնություն և ուժեղացնելու է ուկրաինական կազմակերպություններին քիբերվտանգներից պաշտպանելու միջոցառումները: «Մենք աջակցում ենք Ուկրաինային»,- ասել է գործադիր տնօրեն Չակ Ռոբինսն աշխատակիցներին ուղղված նամակում:

Cisco-ն դարձել է հերթական ամերիկյան ընկերությունը, որը որոշել է դադարեցնել կամ սահմանափակել գործունեությունը Ռուսաստանի Դաշնությունում՝ Ուկրաինայի շուրջ ստեղծված իրավիճակի պատճառով։ Այդ ընկերությունների թվում են Apple Inc.-ը, Oracle Corp.-ը, Boeing Co.-ը, Exxon Mobile Corp.-ը և Walt Disney Co.-ը: