«Փաշինյանի ու Զելենսկու հայտարարությունները կարո՞ղ է նույն մարդն է գրում». Էդուարդ Շարմազանով

ՀՀԿ խոսնակ Էդուարդ Շարմազանովի գրառումը. «Փաշինյանի ու Զելենսկու հայտարարությունները կարո՞ղ է նույն մարդն է գրում։

Հիշո՞ւմ եք: 2020-ի նոյեմբերի 9-ի երեկոյան Նիկոլը գրեց, որ Շուշիի համար մարտերը շարունակվում են։ Դա նոյեմբերի 9 էր։ Գրառումից ընդամենը երեք ժամ անց հայտարարվեց կապիտուլյացիայի մասին։ 2022-ի մարտի 11-ին Զելենսկին հայտարարեց, որ իրենք գնում են դեպի հաղթանակ։ Իսկ նույն ժամանակ ռուսական պաշտոնական լրատվամիջոցները հայտարարում են, որ ռուսական զորքերը Կիևից 10 կմ հեռավորության վրա են։

Մեր ժողովուրդը պոպուլիզմի գինը շատ թանկ վճարեց, նույն ու ավելի ծանր գին վճարում է ուկրաինական ժողովուրդը։ Իսկ այս «շիլան» եփողներն արդեն բացահայտ «փուռն» են տալիս ուկրաինացիներին։

ՆԱՏՕ չեն ընդունում, ԵՄ անդամության հարցն աստիճանաբար ձգձգում են և նույնիսկ եվրոպական դիվանագիտության ղեկավարը հայտարարում է, որ Արևմուտքը սխալվել է՝ Ուկրաինային և Վրաստանին ժամանակին ՆԱՏՕ-ի անդամության հույս տալով։ Իսկ ի՞նչ են մտածում պարոն Բորելի այս ինքնախոստովանության մասին Հայաստանում բնակվող «թունդ արևմտականները»»։