«Ինչպիսի՞ քայլեր է ձեռնարկում ռուսական կողմը, որպեսզի ադրբեջանական զորքերը հետ քաշվեն ելման դիրքեր». լրագրողը՝ Լավրովին

ՌԴ ու ՀՀ ԱԳ նախարարների համատեղ ասուլիսի ժամանակ անդրադառնալով մարտի 24-ին ռուս խաղաղապահ զորախմբի պատասխանատվության գոտում՝ Ասկերանի շրջանի Փառուխ գյուղի հատվածում ադրբեջանական ներխուժմանը, լրագրողները Սերգեյ Լավրովից հետաքրքրվեցին՝ ինչպիսի՞ քայլեր է ձեռնարկում ռուսական կողմը, որպեսզի ադրբեջանական ստորաբաժանումները հետ քաշվեն ելման դիրքեր: «Մարտի 24-ին մենք հայտարարեցինք, որ ռուսական զորախումբը զբաղվում է միջադեպի հանգամանքների ուսումնասիրմամբ. այն մեզ համար վերջնական պարզ չէ: Համոզված ենք, որ մեր հայ ընկերները վստահում են ռուս խաղաղապահներին ու երբեմն հնչող կոչերը՝ նրանց պատասխանատվության կանչելու, ծառայողական քննություն անցկացնելու, չեն արտահայտում հայ ժողովրդի ու ղեկավարության իրական վերաբերմունքը խաղաղապահ առաքելության նկատմամբ: Կրկնում եմ՝ կան հանգամանքներ, որոնք պարզաբանման կարիք ունեն»,- ասաց ՌԴ արտաքին գերատեսչության ղեկավարը: