«ՄԽ համանախագահության ձևաչափի աշխատանքով շահագրգռված չի երեք երկրներից և ոչ մեկը». Հ. Բադալյան

Քաղաքական մեկնաբան Հակոբ Բադալյանի գրառումը. «Մինսկի խմբի համանախագահության ձևաչափի աշխատանքով, ըստ իս շահագրգռված չի երեք երկրներից և ոչ մեկը: Գուցե փոքր ինչ բացառություն է Ֆրանսիան, բայց՝ Ֆրանսիայից այդ հարցում կախված է իհարկե ավելի շատ, քան Հայաստանից, սակայն զգալիորեն քիչ, քան ԱՄՆ-ից ու Ռուսաստանից:
Այդ ձևաչափի աշխատանքում ամենից նվազ շահագրգռությունը, դարձյալ՝ իմ սուբյեկտիվ կարծիքով, ունի ԱՄՆ: Որովհետև ԱՄՆ ունի միջազգային ազդեցության ամենամեծ ու ընդգրկուն գործիքակազմը: Հայտարարությունները, որ հակամարտությունը լուծված չէ, կարգավիճակի հարցը բաց է և այլն, դրանք բոլորովին չեն արտահայտում համանախագահության ձեւաչափի աշխատանքում ԱՄՆ շահագրգռությունը: Դրանք ընդամենը ԱՄՆ ազդեցության մասին հիշեցումներ են:
Ռուսաստանը ունի համանախագահության ձևաչափի աշխատանքի կարիք, նվազագույնը, որպեսզի որոշակի առավելություն ստանա Թուրքիա-Ադրբեջան համատեղ խաղի, Ադրբեջանում թավշյա շոշափելի ազդեցություն ձեռք բերած Իսրայելի, ու նաև որոշակի առումով՝ Իրանի նկատմամբ:
Եթե համառոտ՝ որովհետև թեմայի շուրջ իհարկե հնարավոր է ծավալվել շատ երկար, անդրադառնալ շատ ու շատ շերտերի, այդպիսին է պատկերն «իմ տեսադաշտից»:
Մինսկի խմբի համանախագահության աշխատանքի հետագա ճակատագիրը վճռվում է Ուկրաինայի շուրջ առկա իրավիճակում: Ընդ որում, ուկրաինական ճգնաժամի՝ համանախագահության ձեւաչափի վրա ազդեցության մասին կարծիքս արտահայտել եմ դեռ այն ժամանակ, երբ իրավիճակն Ուկրաինայում չէր մտել ռազմական փուլ»: