«Մայիսի 1-ից նոր ավտոբուսներով կսպասարկվի ևս մի քանի երթուղի»․ քաղաքապետ

385

Երկուշաբթի, 11 ապրիլի, 2022 թ., 20:24

Երևանի քաղաքապետ Հրաչյա Սարգսյանը գրառում է կատարել․ «Սիրելի երևանցիներ,
Այսօր Երևանի քաղաքապետարանում տեղի ունեցած հերթական գործակարգավարական խորհրդակցության շրջանակներում քննարկված ամենակարևոր կետերը ներկայացնում եմ ձեր ուշադրությանը.

Հաշվի առնելով քաղաքային տրանսպորտում 100 դրամանոց մետաղադրամների մեծ պահանջարկը՝ այսօրվանից համայնքային բոլոր նոր ավտոբուսների և միկրոավտոբուսների վարորդներն իրենց մոտ կունենան որոշակի քանակությամբ մանրադրամ:
Երևանի քաղաքապետարանը ձեռք կբերի ևս 100 նոր ավտոբուս: Նախատեսվում է պատրաստել ավտոբուսների գնման համար մրցութային նոր փաթեթ:
Մայրաքաղաքի տրանսպորտային համակարգի բարեփոխումների շրջանակում կարդիականացվի նաև «Էլեկտրատրանսպորտ» ընկերության շարժակազմը: Առաջիկայում կհայտարարվի 15 նոր տրոլեյբուսի ձեռքբերման մրցույթ:
Մայիսի 1-ից «Zhong Tong» մակնիշի նոր ավտոբուսներով կսպասարկվի ևս մի քանի երթուղի: Գործընթացը կկազմակերպվի ավտոբուսային պարկում այս պահին առկա 54 միավոր շարժակազմով:
Ասֆալտապատման աշխատանքներից անմիջապես հետո փողոցները պետք է գծանշվեն: Հիշեցնենք, որ ապրիլի 1-ից Երևանում գծանշումներ կատարելու, ինչպես նաև լուսացույցներ ու ճանապարհային նշաններ տեղադրելու գործառույթն անցել է համայնքին: Խնդրահարույց այս ոլորտը կանոնակարգելու համար Երևանի քաղաքապետարանը մի շարք քայլեր է ձեռնարկել՝ հաշվի առնելով վարորդների կողմից հաճախ բարձրացվող խնդիրները:
Արդեն մեկ շաբաթ է՝ «Շտապբուժօգնություն» ընկերության զանգերի կենտրոնում գործում է հետադարձ զանգի հնարավորությունը: Նոր համակարգի շնորհիվ 1-03 հեռախոսահամարի մուտքային բոլոր զանգերը կգրանցվեն և անպատասխան չեն մնա»:

Աղբյուրը` Հրաչյա Սարգսյան