Գերմանիան աստիճանաբար կհրաժարվի ռուսական էներգառեսուրսներից

1412

Չորեքշաբթի, 20 ապրիլի, 2022 թ., 21:54

Գերմանիան աստիճանաբար կհրաժարվի ռուսական էներգառեսուրսներից: Մասնավորապես, մինչև 2022 թվականի վերջ Բեռլինը մտադիր է ամբողջությամբ դադարեցնել ռուսական նավթի ներկրումը։

Այս մասին Ռիգայում Բալթյան երկրների ԱԳ նախարարների հետ համատեղ ասուլիսի ժամանակ հայտարարել է Գերմանիայի արտգործնախարար Աննալենա Բերբոքը, գրում է Reuters-ը։ Բերբոքն ընդգծել է, որ շուտով Գերմանիան կհրաժարվի նաև ռուսական ածխից։ Դա պետք է տեղի ունենա մինչև այս ամառվա ավարտը։

«Գերմանիան կհրաժարվի ռուսական ածուխ ներկրելուց մինչև ամառվա վերջ: Մենք մինչև ամառ կիսով չափ կկրճատենք նավթի ներկրումը և մինչև տարեվերջ դրանք կդադարեցնենք»,- ասել է նա:

Միաժամանակ, Գերմանիայի ԱԳՆ ղեկավարն ընդգծել է, որ չնայած այն հանգամանքին, որ ռուսական գազից երկրի հրաժարման հստակ ժամկետ չկա, դա անխուսափելի է։ Պատճառը Ռուսաստանից էներգետիկ անկախություն ձեռք բերելու՝ Եվրոպայի ցանկությունն է։

«Եվրոպայի անվտանգությունը նշանակում է, որ մենք նվազեցնում և դադարեցնում ենք մեր կախվածությունը Ռուսաստանից, առաջին հերթին էներգետիկ քաղաքականության մեջ: Մենք ցանկանում ենք դադարեցնել ռուսական գազի ներկրումը: Ավելի լավ է անել այսօր, քան վաղը»,- ասել է Բերբոքը:

Միաժամանակ նա ընդգծել է, որ Գերմանիայի որոշումը՝ հրաժարվելու ռուսական էներգետիկ ռեսուրսներից, վերջնական է։ Նրա խոսքով, նախկինում երկիրը «սխալներ էր անում», ուստի այժմ անհրաժեշտ է հրաժարվել Ռուսաստանի Դաշնության նավթից, գազից և ածուխից։

Ավելի վաղ Ֆրանսիայի նախագահ Էմանուել Մակրոնը հայտարարել էր, որ երկիրը ռուսական գազի մատակարարումների կարիքը չունի։ Նա նաև նշել է, որ աջակցում է ահաբեկչական երկրի դեմ նավթի և գազի ամբողջական էմբարգոյին։