«Շուշիում տեղի ունեցած միջոցառում ասվածը մեզ համար ունի շատ ավելի լուրջ մտահոգության տեղիք»․ Հակոբ Բադալյան

Քաղաքական մեկնաբան Հակոբ Բադալյանի գրառումը. «Ալիևը ելույթ է ունեցել Շուշիում՝ այսպես կոչված Աշխարհի ադրբեջանցիների 5-րդ համաժողովում: Հիմա տեսնենք, Ալիևի ելույթն ավելի հանգամանալից կլուսաբանեն ադրբեջանակա՞ն, թե՞ հայկական լրատվական հարթակները:
Հեգնանք կա իհարկե խոսքիս մեջ, այն իմաստով, որ հայկական մեդիայի որոշակի հատվածում կարծես թե «սադոմազոխիստական» հակումներ կան, շտապել Բաքվից ավելի շուտ հրապարակել Ալիևի բառերը, հատկապես երբ դրանք հնարավոր է Հայաստանում դարձնել ներքաղաքական խաղարկումների առարկա: Դե, իսկ նա էլ բնականաբար շատ լավ չափել է դա ու առիթը բաց չի թողնում դրա վրա խաղալու համար:
Իսկ գործնականում, Շուշիում տեղի ունեցած այդ միջոցառում ասվածը մեզ համար ունի շատ ավելի լուրջ մտահոգության տեղիք: Խոսքը փաստացի ձևավորվող «ադրբեջանական» սփյուռքի մասին է:
Ալիևը հետևողականորեն ձևավորում է այդ սփյուռքը, որը ունի մի էական առավելություն բառի բուն իմաստով՝ այդ Սփյուռքը ամբողջությամբ ենթակա է ադրբեջանական պետական քաղաքականությանը, ի տարբերություն՝ ցավոք սրտի, հայկական սփյուռքի, որտեղ գործող կառույցները ըստ էության «բոլորը բոլորի դեմ» կռվի վիճակում են, դրանց մի զգալի մասը այդ թվում Հայաստանի դեմ կռվի:
Լրջագույն մտածելիք ունենք էդտեղ»: