«Չավուշօղլուի «ժեստը» ցինիզմ է». Հակոբ Բադալյան

Քաղաքական մեկնաբան Հակոբ Բադալյանի գրառումը. «Չավուշօղլուի «ժեստը» ցինիզմ է, իհարկե, բայց գուցե կա նաև «հակառակ» երես և այդ ցինիզմի դրսևորումն ունի և նյարդայնացնող քաղաքական պատճառ: Պատճառ, որը կարող է կապված լինել հայ-թուրքական գործընթացի հետ: Թուրքիան մի քանի անգամ խոսում է այն մասին, թե՝ ինչո՞ւ հանդիպել երրորդ երկրում, եթե խոսքը երկուսիս հարաբերության մասին է, հանդիպենք Հայաստանում ու Թուրքիայում:

Հայ-թուրքական ուղիղ խոսակցության կարևորության մասին արտահայտվել եմ բազմիցս, բայց նաև կարծիք հայտնել, որ այդ աշխատանքում Հայաստանը պետք է փորձի օգտագործել «երրորդ կողմերի»: Նախ, որովհետև միևնույն է դրանք ունեն բավարար ներուժ այսպես, թե այնպես ազդել հենց իրենք՝ այդ դեպքում առավել նպատակահարմար է աշխատել այդ «ազդեցության» հետ, և բացի այդ էլ «երրորդ կողմերի» գործոնն օգտագործել քաշային կատեգորիաների այն ահռելի տարբերությունը թեկուզ որոշակի փոխհատուցելու համար, որ կա Հայաստանի ու Թուրքիայի միջև:

Ընդ որում՝ ընդունված է «երրորդ կողմ» դիտարկել Ռուսաստանին, բայց դա միայն Ռուսաստանը չէ, և թերևս նույնիսկ լոկ ԱՄՆ ու Եվրոպան էլ չեն: Կան և իրենց խնդիրներն ու հետաքրքրություններն ունեն բոլորը:

Հայաստանն առայժմ, կարծես թե, շարժվում է այդ ճանապարհով, ինչը թերևս նյարդայնացնում է Թուրքիային, ու կարևորը՝ նյարդայնացնում է այն պատճառով, որ միջազգային քաղաքական իրողությունների համատեքստում ունեն հայ-թուրքական գործընթացի անհրաժեշտությունը և նվազագույնը՝ նպատակահարմար չեն գտնում հենց իրենց հրաժարվելը: Ու թերևս բացառված չէ, որ կլինեն այդպիսի «ցինիկ սադրանքներ», Հայաստանին գործընթացից հրաժարման մղելու համար, երբ գործընթացի ձախողման պատասխանատվությունը կընկնի Հայաստանի վրա»: