«Սա կշարունակվի այնքան ժամանակ, քանի դեռ ոստիկանական ուժերը գերազանցում են դիմադրության շարժման ուժերին». Հակոբ Հակոբյան

ԱՀ ԱՆ կից միջգերատեսչական դատահոգեբուժական հանձնաժողովի նախագահ Հակոբ Հակոբյանը ֆեյսբուքյան իր էջում գրել է. «Վաղ առավոտից ոստիկանները բիրտ ուժի կիրառմամբ բերման են ենթարկում ավտոերթի մասնակիցներին: Սա կշարունակվի այնքան ժամանակ, քանի դեռ ոստիկանական ուժերը գերազանցում են դիմադրության շարժման ուժերին: Ուստի եկել է ժամանակը: Հանրային կյանքի տարբեր ոլորտներ ներկայացնող հայ ազգի բոլոր ներկայացուցիչները, այսօր պարտավոր են գիտակցել պատասխանատվությունը պետության հանդեպ և անձամբ նախաձեռնել ապազգային իշխանության հեռացումը: Եկել է տաղանդավոր և հնարամիտների ժամանակը: Ձեր ժամանակը, հայեր։ Պետք է աշխարհին ցույց տալ, թե ինչպես է լինում հայ ազգային հեղափոխությունը: Հավաքեք ձեր ընկերներին, հարազատներին, ծանոթներին: Եթե դուք թատերական կամ երաժշտական հաստատությունների ուսանող եք, փորձերը կատարեք հենց փողոցում։ Սովորեք փողոցներում, աշխատեք փողոցներում՝ խաչմերուկներում, կամուրջների վրա: Աթոռներ դրեք, գրքեր կարդացեք, պարեք, երգեք, պոեզիա կարդացեք: Բոլորը փողոցներում, խաչմերուկներում, թունելներում: Ընդհատել, շեղել ուշադրությունը: Ավտոբուսներում, մետրոյում, խանութներում…..ամենուր: Պետք է դիմադրության ձայն լինի. քաղաքը պետք է ոտքի կանգնի, երկիրը պետք է ոտքի կանգնի, Հայ ազգը պետք է ոտքի կանգնի: Միայն այսպես կարելի է դիմադրել, միայն այսպես կարելի է ազգայինը թելադրել»: