«Թող Լավրովը պատասխանի՝ որն է Լեռնային Ղարաբաղը»․ Վահրամ Աթանեսյան

Քաղաքական վերլուծաբան Վահրամ Աթանեսյանի գրառումը․ «ԵԱՀԿ ՄԽ համանախագահության «չգոյության» մասին Բաքվում Ռուսաստանի արտգործնախարար Լավրովի հայտարարությունը մեզանում ապոկալիպտիկ դատողությունների առիթ է դարձել։ Բայց ԵԱՀԿ ՄԽ համանախագահությունը Լավրովը չի ձևավորել, որպեսզի մի հայտարարությամբ էլ ինքը լուծարի։ Դրա համար հարկ է ԵԱՀԿ գագաթաժողով գումարել և իրավական ուժ ունեցող որոշում ընդունել։ Երկրորդ, ոչ թե ԵԱՀԿ ՄԽ համանախագահությունն է ԼՂ խնդիր ստեղծել, այլ ԼՂ խնդրի լուծման համար է այդ խումբը և նրա համանախագահությունը ստեղծվել։ Նոյեմբերի 9/10-ի Հայտարարության տակ առկա է նաև ՌԴ նախագահի ստորագրությունը։ Այնտեղ խոսք չկա, որ ԼՂ խնդիրը «լուծված է»։ Ավելին, հստակ գրված է, որ կա Լեռնային Ղարաբաղ, կա Լաչինի միջանցք, որը Լեռնային Ղարաբաղը կապում է Հայաստանին։ Հիմա թող Լավրովը պատասխանի՝ ո՞րն է Լեռնային Ղարաբաղը, ի՞նչ է նշանակում նրա կապը ոչ թե Ադրբեջանի, այլ՝ Հայաստանի հետ։
Հ․Գ․ Երբ Բրյուսելում Եվրոպայի խորհրդի նախագահը խոսեց «Ղարաբաղի էթնիկ հայերի իրավունքների և անվտանգության» մասին, Արցախի Ազգային ժողովի կորովի քաղաքական ուժերը հաջորդ օրը մի աշխարհացունց հայտարարություն ընդունեցին։ Իսկ Լավրովի ասածներն ընդունվում են ի գիտությու՞ն»։