«Քաղաքականությունն իջեցրել են կենցաղային մակարդակի». Զոյա Թադևոսյան

Տնտեսագետ, ՀԱԿ վարչության անդամ Զոյա Թադևոսյանը Ֆեյսբուքի իր էջում գրել է. «Խաղաղության օրակարգը գուրգուրելու, փայփայելու, օր առաջ կյանքի կոչելուն ուղղված ջանքերը համախմբելու փոխարեն քաղաքական ուժերը աջից, ձախից, կենտրոնից ապակողմնորոշող, ժողովրդին մոլորեցնող կոչեր և ահազանգեր են հնչեցնում: Քաղաքականությունն իջեցրել են կենցաղային մակարդակի, որտեղ թագավորում է նորին գերազանցություն անձնական շահը: Բամբասանքն ու չարախոսությունն էլ մատուցվում է որպես աղանդեր:

Իրականությունն այն է, որ խաղաղությունը մեր երկրի զարգացման առաջնային նախադրյալն է: Անցած 30 տարիները մի՞թե բավարար փորձաշրջան չեղան խաղաղության կարևորությունն ըմբռնելու համար:

Նողկալի և դատապարտելի է, երբ խաղաղությանը դեմ արտահայտվողները կամ բայղուշաբանները, խուսափելով զինվորական ծառայությունից, թաքնվում են իրենց կանանց և մայրերի փեշերի տակ կամ ռազմաճակատ մեկնելու ճոխ ցուցադրություն են կազմակերպում, սակայն զենքն ուսին լուսանկարվում են Դիլիջանի անտառներում և հրապարակում՝ որպես իրենց «անձնազոհության հերոսական դրվագի» ապացույց:

Բոլոր նրանք, ովքեր դեմ են խաղաղությանը, իրենց զավակների հետ միասին, պարտավոր են զինվորագրվել: Այնժամ կեղծ հայրենասերների խոսքի և գործի ողջ սնանկությունը կբացահայտվի:

Մեր ժողովուրդն իր արտասուքով և տառապանքով վաստակել է խաղաղ և անվտանգ հայրենիքում ապրելու իրավունքը: Նույնիսկ ամենառադիկալ քաղաքական ուժերը պարտավոր են գլուխ խոնարհել խաղաղության դրոշի առջև, հակառակ դեպքում հայ մարդը շարունակելու է գլուխ խոնարհել Եռաբլուրում...»: