««Խաղաղության դարաշրջան» կոչված ուտոպիան վտանգավոր ելք է ունենալու մեզ համար»․ քաղաքագետ

Քաղաքագետ Արա Պողոսյանի գրառումը․ «Այսօրվա սահմանային միջադեպերը վերջին օրերի զարգացումների ֆոնին սպասելի էին։ Երեկ ռուսական RTVI հեռուստաընկերությանը տված հարցազրույցի ընթացքում կանխատեսել էի նոր միջադեպեր և ռուսական կողմի ջանքերի ակտիվացում՝ Հայաստանի և Ադրբեջանի առաջնորդների միջև նոր հանդիպում կազմակերպելու միջոցով։
Արևմուտքը վերջին օրերի ակտիվության շնորհիվ այս պահի դրությամբ ունի որոշակի ազդեցություն «կարգավորման գործընթացի» վրա, ինչը որոշակի ասպեկտներում կարող է դուր չգալ ռուսական կողմին, գուցե նաև ադրբեջանական կողմին, հաշվի առնելով ԱՄՆ պետքարտուղարի և Ալիևի միջև վերջին հեռախոսազրույցի հետ կապված միջադեպին։ Խոսքը բնականաբար ԱՄՆ պետքարտուղարության կողմից հրապարակված տեքստն էր, որտեղ խոսվում էր ԵԱՀԿ Մինսկի խմբի ձևաչափի մասին։
Այսպիսով ակնհայտ է, որ Ադրբեջանը գնալու էր նոր սադրանքների, իսկ այդ սադրանքների ժամանակավոր հանգուցալուծումը հավանաբար ՌԴ-ում հերթական հանդիպմամբ տեղի կունենա։
Այստեղ մի բան պարզ է, Արցախի հարցը դեռ երկար ժամանակ միջազգային լուծում չի ստանալու (իհարկե, եթե նոր աշխարհաքաղաքական տեղաշարժեր չլինեն), իսկ դա նշանակում է, որ պետք է մեզ տրված շունչ քաշելու ժամանակը օգտագործենք հնարավորինս արագ ոտքի կանգնելու համար։ Ցավոք մեր տարածաշրջանում, և եղած թշնամիների հետ «խաղաղության դարաշրջան» կոչված ուտոպիան վտանգավոր ելք է ունենալու մեզ համար, եթե չկարողանանք ժամանակին վերակազմակերպել մեր անվտանգային համակարգը, դիվերսիֆիկացնել դաշնակցային հարաբերությունները (առանց նոր թշնամիներ ձեռք բերելու), ձևակերպել մեր պետության առաքելությունը ընդունել ազգային ռազմավարություն՝ մոբիլիզացնելով համահայկական ջանքերը հանուն հայկական պետականության կայացման և հարատևության»։