«Ադրբեջանի հետ որևէ ձևաչափով գոյակցությունն արցախցիների համար բացառված է». Մանե Թանդիլյան

«Ապրելու երկիր» կուսակցության ղեկավար Մանե Թանդիլյանի գրառումը․ «Օգոստոսի 1-ին Արցախի Հանրապետության մի շարք հատվածներում Ադրբեջանի կողմից իրականացված սադրանքները նպատակ ունեն Արցախի Հանրապետության բնականոն կյանքը հերթական անգամ խաթարել՝ շարունակելով Արցախի հայաթափության պետական ծրագիրը։

Արցախյան վերջին պատերազմից հետո Արցախի գրեթե ամբողջ բնակչության վերադարձը հայրենիք, ակնհայտ է, խախտել է Ադրբեջանի բոլոր ծրագրերը, իսկ Արցախի Հանրապետության Պաշտպանության բանակի՝ իր հայրենիքը պաշտպանելու առաքելության կատարումը փաստում է, որ Արցախը վճռական է իր ապագան կանխորոշելու հարցում։

«Ապրելու երկիր» կուսակցությունն իր աջակցությունն է հայտնում Արցախի Հանրապետությանը՝ արցախցու՝ իր հողում ապրելու իրավունքի լիարժեք իրացման հարցում։

Միևնույն ժամանակ, հերթական անգամ ակնհայտ է, որ Ադրբեջանի հետ որևէ ձևաչափով գոյակցությունն արցախցիների համար բացառված է, քանի որ Ադրբեջանն Արցախի հարցով ունի միակ նպատակ՝ Արցախի վերջնական հայաթափում։

Միջազգային հանրությունը պետք է հստակ արձագանքի նման միջադեպերին՝ ամրագրելով, որ արցախցիների՝ իրենց հողում ապրելու անբեկանելի իրավունքը վաղուց ապացուցված է, և Ադրբեջանն այդ հարցում չի կարող ունենալ որևէ դերակատարում»։