Ռուսաստանը ցանկանում է ավելի շատ գազ արտահանել Թուրքիայի տարածքով. Պուտինն ու Էրդողանը հանդիպել են

Թուրքիայի նախագահը Ղազախստանում հանդիպել է ռուս գործընկեր Վլադիմիրի Պուտինի հետ, որտեղ քննարկել են մի շարք հարցեր, այդ թվում՝ ռուսական գազի տարանցումը։
Ռուսաստանը ցանկանում է ավելի շատ գազ արտահանել Թուրքիայի տարածքով՝ այն դարձնելով նոր գազային «հանգույց», որպեսզի պահպանի իր էներգետիկ ազդեցությունը Եվրոպայում։

Այս առաջարկը ՌԴ նախագահ Վլադիմիր Պուտինն արել է իր թուրք գործընկեր Ռեջեփ Թայիփ Էրդողանին Ղազախստանում կայացած հանդիպման ժամանակ, գրում է Reuters-ը։

Ըստ Պուտինի, Թուրքիան առաջարկում է Եվրոմիություն գազ մատակարարելու ամենահուսալի երթուղին, և առաջարկվող հարթակը, իբր, թույլ կտա գները սահմանել առանց քաղաքականության։ Կրեմլի ղեկավարը Էրդողանին ասել է, որ հանգույցը կլինի «հարթակ ոչ միայն մատակարարումների, այլև գնի որոշման համար, քանի որ սա շատ կարևոր հարց է»: «Այսօր այդ գները բարձր են: Մենք կարղ էինք դրանք նորմալ ձևով կարգավորել շուկայական մակարդակով, առանց քաղաքական ենթատեքստերի»,- ասել է Պուտինը։

Այս հանդիպման ժամանակ, ըստ Պեսկովի, Էրդողանի ու Պուտինի «ռուս-ուկրաինական կարգավորման թեման չի քննարկվել»։

Այդուհանդերձ, նախագահները քննարկել են հացահատիկի արտահանման՝ Ռուսաստանի Դաշնության հնարավորությունը։ Ռուսաստանը դժգոհում է, որ հացահատիկի և պարարտանյութի իր արտահանումը, չնայած արևմտյան ուղղակի պատժամիջոցների չի ենթարկվում, շարունակում է խոչընդոտվել արտասահմանյան նավահանգիստներ մուտք գործելու և նավերի հետ կապված ապահովագրություն ձեռք բերելու խնդիրների պատճառով:

Այս համատեքստում Էրդողանն ասել է Պուտինին. «Մենք վճռական ենք ավելացնել և շարունակել հացահատիկի արտահանումը... և ռուսական հացահատիկի և պարարտանյութերի տեղափոխումը նվազ զարգացած երկրներ Թուրքիայի միջոցով»: