«Գերխնդիր է, որ հստակեցվի Լեռնային Ղարաբաղում «շփման գիծը»». Վահրամ Աթանեսյան

Քաղաքական վերլուծաբան Վահրամ Աթանեսյանը գրում է. «Եթե հայ-ադրբեջանական և ԼՂ կարգավորման հիմքը նոյեմբերի 9-ի հայտարարությունն է, իսկ այլ փաստաթուղթ չկա, ապա հստակ պետք է արձանագրել հետևյալը․

- Ռուսաստանը միջնորդ չէ համաձայնության, ուրեմն՝ և կոնֆլիկտի կողմ է,

- պետք է Ռուսաստանի մասնակցությամբ որոշվի, թե ո՞րն է հայտարարությամբ բոլոր կողմերից ճանաչված Լեռնային Ղարաբաղը՝ որպես վարչատարածքային միավոր

- առաջնահերթություն է, որ հստակեցվի Լաչինի միջանցքը՝ նոյեմբերի 9-ի հայտարարությամբ նախանշված հինգ

կիլոմետր լայնությամբ և գործարկման ռեժիմով

- գերխնդիր է, որ հստակեցվի Լեռնային Ղարաբաղում «շփման գիծը», ինչպես որ ձևակերպված է նոյեմբերի 9-ի հայտարարությամբ,

- դիսկուրսից պետք է բացառվի «Լեռնային Ղարաբաղում և նրա շուրջ»՝ դեռևս ԽՍՀՄ ժամանակներին արված ռազմա-քաղաքական բնութագրումը, ԼՂ խնդիրը և Հայաստան-Ադրբեջան սահմանազատումը միանշանակորեն պետք է առանձնացվեն։

Պաշտոնական Ստեփանակերտի խնդիրն է․

- տեր կանգնել զինված հակամարտության կողմի իրավունքին և, ըստ այդմ, ստանձնել հստակ պատասխանատվություն,

- որևէ ձևով չմիջամտել, առավել ևս չխանգարել Հայաստան-Ադրբեջան հարաբերությունների կարգավորմանը,

- վերակազմակերպվել որպես սուբյեկտ, միջազգային հնարավոր բոլոր հարթակներում պաշտպանել ԼՂ ինքնորոշման իրավունքի իրավատիրությունը,

- ձերբազատվել ինքնորոշման իրավունքի երաշխավորի պարտականությունը Հայաստանին հասցեագրելու խոսույթից,

- մշակել և ՄԱԿ-ին, ԵԱՀԿ Մինսկի խմբի համանախագահ երկրներին ներկայացնել Ադրբեջանի իրավազորությունից դուրս պետականության իրավունքի սեփական հիմնավորումները,

- պատրաստ լինել այդ իրավունքը պաշտպանել միջազգային դատական ատյաններում,

- վերակազմավորել ինքնապաշտպանության կառույցները և այդ մասին իրազեկել ՄԱԿ-ին»։