«Մեզ համար տնտեսապես շահեկան է Բաքու-Ղազախ-Իջևան-Երևան երկաթգծի շահագործումը»․ Խոսրով Հարությունյան

Հայաստանի նախկին վարչապետ Խոսրով Հարությունյանը 168 TV-ին տված հարցազրույցի ընթացքում խոսել է Մեղրիով երկաթգծի բացման մասին․ «Հայաստանը այդ երկաթգծի գործարկման արդյունքում ավելի է իզոլացվելու և հայտնվի տարածաշրջանի մայթեզրին նստած՝ ինչպես նստած էր, որովհետև դրա գործարկումը միայն ձեռնտու է Թուրքիային ու Ադրբեջանին։ ՀՀ-ն պետք է 150 մլն դոլար ծախսի, որ Ադրբեջանից բեռնափոխադրումներն անխափան հասնեն Թուրքիա։ Այդ երկագծի շահագործման մասին խոսող ՌԴ փոխվարչապետ Օվերչուկին հարց ունեմ, եթե ՀՀ-ն իր միջոցներով կառուցի այդ երկաթուղին, ի՞նչ է դրանից շահելու, երբ ճանապարհի 800 կմ-ը Ադրբեջանի տարածքում է, ընդամենը 47-ը՝ Հայաստանի»։

Հարությունյանը հիշեցրել է, որ նոյեմբերի 9-ի եռակողմ հայտարարության մեջ հստակ ասվում է տարածաշրջանային կոմունիկացիաների ապաշրջափակման անհրաժեշտության մասին, որպեսզի հնարավոր լինի թշնամական հարաբերություններ ունեցող Հայաստանի և Ադրբեջանի միջև ապահովել այնպիսի տնտեսական փոխշահավետ հարաբերություններ, ինչը ժամանակի ընթացքում աստիճանաբար կձևավորի երկու երկրների միջև վստահության մթնոլորտ։ «Այս համատեքստում մեզ համար տնտեսապես շահեկան է Բաքու-Ղազախ-Իջևան-Երևան երկաթգծի շահագործումը, որի 361 կմ-ը անցնելու է Բաքվի տարածքով, 300 կմ-ը՝ Հայաստանի, ինչը կբերի բալանսավորման»։,- նշել է Հարությունյանը: