«Ի տարբերություն ՀՀ իշխանությունների՝ Արցախի իշխանությունները եկել են գիտակցմանը, որ պարտավոր են միանալ քաղաքական բոլոր ուժերին». Մետաքսե Հակոբյան

Արցախի ԱԺ «Արդարություն» խմբակցության պատգամավոր Մետաքսե Հակոբյանը 168 TV-ի եթերում անդրադարձել է Ստեփանակերտում անցկացված բազմահազարանոց հանրահավաքին. «Երեկվա պահանջների վերջնարդյունքը Արցախի և ՀՀ միացումն է: Բայց, ցավոք, մենք 2018 թվականին շատ հեռացանք այն բաղձալի երազանքից, որին քիչ-քիչ մոտենում էինք: Հիմա այնպիսի իրավիճակում ենք հայտնվել, որ պետք է կարողանանք ուղղակի ֆիզիկական բնաջնջումից փրկվել, փրկել Արցախը՝ Ադրբեջանին բռնակցումից։ Ի տարբերություն ՀՀ իշխանությունների՝ Արցախի իշխանությունները հիմա եկել են այն գիտակցմանը, որ պարտավոր են միանալ քաղաքական բոլոր ուժերին։ Այն ամենը, ինչը մեր հակառակ կողմում է, շատ զորեղ է, և մեր միասնական չլինելու պարագայում կկարողանա մեզ ուղղակի ոչնչացնել»,- շեշտել է պատգամավորը։