«Եթե դու գոհ չես ռուսական խաղաղապահ ուժերից, քեզ ո՞վ էր խնդրում սեփական զորքերը հանել Արցախից»․ Արթուր Խաչատրյան

ԱԺ «Հայաստան» խմբակցության պատգամավոր Արթուր Խաչատրյանը լրագրողների հետ զրույցում խոսելով Սոչիի եռակողմ հանդիպումից հետո տարածված հայտարարության մասին՝ ասել է․ «Փաշինյանը Հայաստանի միակ ղեկավարն է, նույնիսկ Սովետական Հայաստանի ղեկավարներից սկսած, որը ստորագրում է փաստաթղթերի տակ, որոնցում նշված չէ, որ Արցախյան հակամարտությունը պետք է կարգավորվի իրավահավասարության և ազատ ինքնորոշման սկզբունքի հիման վրա»։

Խաչատրյանն անդրադարձել է նաև Ռուսաստանի դեմ ուղղված՝ պարտավորությունները չկատարելու մեղադրանքներին․ «Որևէ փաստաթուղթ չկա, որով պարտադրվեր, որ Հայաստանն իր Զինված ուժերը դուրս հաներ Արցախի Հանրապետությունից, դա Փաշինյանի ինքնակամ, միանձնյա որոշումն է․ կամավոր է դա արվել, պարտադրանքով է արվել, բանավոր համաձայնությամբ է արվել, չգիտեմ, բայց փաստ է, որ Փաշինյանը հանել է հայկական ԶՈՒ-ն Արցախից՝ առանց որևէ միջազգային փաստաթուղթ ստորագրելու։ Հայաստանն է հանդիսանում Արցախի անվտանգության երաշխավորը, որը նաև այս իշխանություններն էին հայտարարել։ Իրենք դուրս են հանել հայկական զորամիավորումները, դեռ մի հատ էլ մուննաթ են գալիս ռուսների վրա, թե լավ չեն անում։ Եթե դու գոհ չես ռուսական խաղաղապահ ուժերի գործողություններից, քեզ ո՞վ էր խնդրում սեփական զորքերը հանել։ ՀՀ իշխանություններն իրենց պարտականությունները չեն կատարել, հիմա էլ ուրիշների վրա մուննաթ են գալիս»։