«Ալիևը մեղադրում է ֆրանսիացիներին՝ Ալժիրում ցեղասպանություն իրականացնելու մեջ»․ Արտյոմ Երկանյան

Լրագրող, հեռուստամեկնաբան Արտյոմ Երկանյանը «Շանթ» հեռուստաընկերության եթերում անդրադարձել է Ադրբեջանի նախագահի մեղադրանքներին՝ ուղղված ֆրանսիացիներին․ «Իլհամ Ալիևն Ալժիրում արաբական երկրների լիգայի 31-րդ գագաթնաժողովի ընթացքում, հավանաբար պարզապես նպատակ ունենալով օգտագործել գագաթնաժողովի բարձր ամբիոնը՝ հակահայկական, այդ թվում նաև հակաֆրանսիական հայտարարություններ հնչեցնելու համար, ասել է․ «Ալժիրի ժողովրդի դեմ ոճրագործությունները կատարել է Ֆրանսիան: Այդ ջարդերից 1.5 մլն մարդ է մահացել: Աշխարհը չպետք է մոռանա ֆրանսիացիների արածը»:

Պատճառը պարզ է. նոյեմբերի 15-ին Ֆրանսիայի Սենատը քվեարկության է դնելու մի բանաձև, որը ենթադրում է շատ կոշտ գնահատականներ Ադրբեջանի հասցեին՝ մասնավորապես դատապարտելու են ադրբեջանական ագրեսիան ՀՀ դեմ, և ենթադրվում է, որ մեղադրելու են Ադրբեջանի իշխանություններին՝ Արցախում մարդկության դեմ կատարած հանցագործությունների համար: Սենատորները նաև պատրաստվում են դիմել երկրի կառավարությանը՝ կոչ անելով ոչ միայն հրաժարվել ադրբեջանական նավթից և գազից, այլ նաև հասնել նրան, որ Եվրոմիությունը նույնպես հրաժարվի ադրբեջանական էներգակիրներից: Եվ ահա այսպես է Ադրբեջանը փորձում պատասխանել ֆրանսիացիներին»,- մանրամասնել է Երկանյանը: