«Լինելու է ՆԳՆ քաղաքականացված նախարար»․ Գեղամ Մանուկյան

ԱԺ «Հայաստան» խմբակցության պատգամավոր Գեղամ Մանուկյանը լրագրողների հետ զրույցում անդրադարձել է Ներքին գործերի նախարարություն ստեղծելու մասին նախագծի ընդունմանը․ «Այն միտումները, որով ձևավորում են ՆԳՆ-ն, ոստիկանությունը շատ ավելի քաղաքական ենթակայության տակ մտցնելն է, իսկ ՀՀ-ում ոստիկանությունը ծառայեցնում են տոնածառեր պաշտպանելու համար։ Լինելու է ՆԳՆ քաղաքականացված նախարար, հիմա էլ արդեն մեր գործընկերներ լրագրողները ՔՊ-ական մի քանի անուններ են շրջանառում․ ոստիկանապետը, երբ ենթարկվում է ՆԳՆ-ի քաղաքականացված նախարարին, շատ ավելի ուղղորդված ենթակայություն է»։

Դիտարկմանը՝ «ոստիկանապետը ՔՊ-ից չէ, սակայն Փաշինյանի համադասարանցին է», պատգամավորն արձագանքել է․ «Ներկայիս օրենսդրությամբ մեկ այլ բան է վարչապետի կողմից ոստիկանապետին տրվող հրահանգը, որը շատ հաճախ օրենքի սահմաններում չի, մեկ այլ հարց է՝ արդեն օրենքով ամրագրված ՆԳՆ նախարարը հրաման է տալիս իր ենթակա ոստիկանության պետին (ոստիկանապետը լինելու է ներքին գործերի նախարարի տեղակալ)․ դրանք լրիվ տարբեր իրավիճակներ են»։