«Թուրքիայի դեսպանի հայտնվելը Լաչինի միջանցքում ուղերձ է Ռուսաստանին»․ Տիգրան Աբրահամյան

«ՄԱԿ Անվտանգության խորհրդում հնչած հայտարարություններն անհրաժեշտ ճնշումներ էին Ադրբեջանի նկատմամբ, բայց խնդիրն ամբողջապես չեն լուծում, ՄԱԿ ԱԽ-ն կարող է վճռական ազդեցություն ունենալ իրավիճակի հանգուցալուծման վրա, բայց դեռևս այդ կետին չենք հասել: Եթե ՄԱԿ-ը սահմանափակվի միայն այդ հայտարարություններով, այս իրավիճակում որևէ փոփոխություն չի լինի»,- 24TV-ի եթերում, անդրադառնալով Նյու Յորքում պաշտոնական Երևանի պահանջով հրավիրված ՄԱԿ-ի Անվտանգության խորհրդի նիստին, նման կարծիք է հայտնել ԱԺ «Պատիվ ունեմ» խմբակցության քարտուղար Տիգրան Աբրահամյանը։

Ադրբեջանում Թուրքիայի դեսպան Ջահիթ Բաղչինի Լաչինի միջանցք այցի մասին խոսելիս՝ պատգամավորը ընդգծել է․ «Միջանցքի փակման գործընթացում Թուրքիան շարժիչի դեր ունի, իր քայլերով նպաստում և ուղղորդում է Ադրբեջանին՝ ցույց տալով Թուրքիայի մեծ ազդեցությունը տարածաշրջանում: Թուրքիայի դեսպանի հայտնվելը միջանցքում ուղերձ է պարունակում՝ ոչ այնքան Հայաստանին ու Արցախին, որքան՝ Ռուսաստանին: Թուրքիան փորձում է ՌԴ-ի դերը նվազեցնել ու հեղինակազրկել՝ ցույց տալ, որ պատրաստվում են ակտիվ գործել»,- եզրափակել է Աբրահամյանը։