Բայրամովը Լավրովին հավաստիացրել է, թե Լաչինի ճանապարհը բաց է

Հեռախոսազրույց է տեղի ունեցել Ադրբեջանի արտգործնախարար Ջեյհուն Բայրամովի և ՌԴ ԱԳ նախարար Սերգեյ Լավրովի միջև։

Ըստ Ադրբեջանի ԱԳՆ-ի՝ նախարարները քննարկել են տարածաշրջանում և Լաչինի ճանապարհի շուրջ ստեղծված իրավիճակը, այդ թվում՝ եռակողմ հայտարարությունների իրականացման հետ կապված հարցեր։ Ջեյհուն Բայրամովը նշել է, որ ադրբեջանական կողմ, իբրև թե, իր պարտավորություններին համապատասխան, երաշխավորում է Լաչինի ճանապարհով քաղաքացիների, տրանսպորտային միջոցների և ապրանքների տեղաշարժի անվտանգությունը։ «Ինչպես երևում է տեսագրություններից, որոնք արձանագրել են Կարմիր խաչի միջազգային կոմիտեի, հայկական շտապօգնության մեքենաների, խաղաղապահ զորախմբի մեքենաների և այլ մեքենաների անխոչընդոտ տեղաշարժը, ճանապարհը բաց է»,- ասել է նա։

Բացի այդ, ընդգծվել է, որ ադրբեջանցի ակտիվիստների բողոքի ակցիան իրականացվում է իբրև թե «Ադրբեջանի տարածքում հայերի անօրինական տնտեսական գործունեության դեմ»։

Նշվել է, որ, «չնայած ճանապարհը մարդասիրական նպատակներով օգտագործելու համար ստեղծված բոլոր պայմաններին, անընդունելի է հայկական կողմի և ադրբեջանական տարածքներում իրենց հայ բնակիչների «ներկայացուցիչներ» անվանող անձանց կողմից բնակչությանը ճանապարհից օգտվելուց հետ պահելը և դրանով իսկ արհեստականորեն ստեղծելը հումանիտար իրավիճակի իբր վատթարացման տպավորություն»։