«Ճանապարհը սառած է, դանդաղ քշեք մեքենան». «Անհանգստացեք Լաչինի միջանցքի համար». լեզվակռիվ՝ ԱԺ հանձնաժողովի նիստում

Այսօր ԱԺ պաշտպանության և անվտանգության հարցերի հանձնաժողովի նիստի մեկնարկին ընդդիմադիր պատգամավոր Գեղամ Մանուկյանը տեղեկացրեց, որ ստիպված է լինելու մեկնել Արարատի մարզ՝ բերման ենթարկված իր ընկերներին տեսակցելու և փորձելու ինչ-որ ձև խոչընդոտել իր խոսքով՝ իշխանությունների քաղաքական խայտառակ հետապնդումները․ «Այսօր վաղ առավոտյան՝ ժամը 7-ին, իրավապահները, սովորության համաձայն, հերթական քաղաքական հետպնդման շրջանակներում Արարատի մարզի բազմաթիվ դաշնակցականների՝ «Դիմադրության շարժման անդամների» տներ են մտել խուզարկության, այդ թվում՝ Արարատի մարզի մեր կառույցի ղեկավար, ԱԺ աշխատակից Գերասիմ Վարդանյանի տուն, հակառակ, որ մանկահասակ երեխաներ են եղել տանը։ Բազմաթիվ մեր ընկերներ հիմա բերման են ենթարկված ոստիկանական բաժանմունքներում։ Այս երկրում կարմիր բերետավորները, հարյուրավոր ոստիկաններ հավաքվում են Կառավարության շենքի դիմաց, որպեսզի Նիկոլ Փաշինյանը Կառավարության մի մասնաշենքից գնա մյուս մասնաշենք, ամբողջ այդ տարածքում մեքենաներն ազատում են, փոխանակ զբաղվեն Լաչինի միջանցքի հարցով»,- ասաց Մանուկյանը։

Պատգամավորի այս հայտարարությունից հետո ՔՊ-ական Անդրանիկ Քոչարյանը վրդովվեց․ «Հասկացանք, արեցիք ձեր հայտարարությունը, գնում եք դուք։ Ճանապարհը սառած է, դանդաղ քշեք մեքենան»։
Որին էլ ի պատասխան Մանուկյանը հորդորեց չանհանգստանալ իր մասին․ «Անհանգստացեք Լաչինի միջանցքի համար, կատակներ չանե՛ք դրա մասին»։