«Որ առաջարկում եք Արցախին երկխոսել Ադրբեջանի հետ, Բաքուն նույնիսկ քեզ հետ չի ուզում երկխոսել»․ թուրքագետ

«Չի կարելի Հայաստանի և Արցախի փրկությունը դիտարկել կամ-կամ-ով, իբրև թե՝ կամ մեկը կամ էլ մյուսը պետք է փրկել։ Դուք վերցրել եք իշխանությունը առանց կամ-կամ-ի, հիմա հասցրել ենք այնպիսի վիճակի, որ ըստ ձեզ՝ մենք ունենք կամընտրական ընտրելու հնարավորություն»,- 24TV-ի եթերում նման կարծիք է հայտնել թուրքագետ Ռուբեն Մելքոնյանը՝ խոսելով Հայաստանի և Արցախի առջև ծառացած անվտանգային սպառնալիքներից։

Անդրադառնալով հունվարի 12-ի Կառավարության նիստի մեկնարկին վարչապետ Փաշինյանի կողմից արված հետևյալ հայտարարությանը, ըստ որի՝ «Ստեփանակերտը պետք է Բաքվի հետ երկխոսություն սկսի», Մելքոնյանը նկատել է․ «Նման անիրատեսական առաջարկներով հանդես գալը ինչքանո՞վ է ճիշտ մարդու համար, որը ստանձնել է այդ պատասխանատվությունը։ Որ առաջարկում եք՝ Բաքուն երկխոսելո՞ւ է Ստեփանակերտի հետ, Բաքուն նույնիսկ քեզ հետ չի ուզում երկխոսել»։