Երկուշաբթի, 23 փետրվարի, 2026 թ.
|
Ստեփանակերտում`   +4 °C

«Սարուշենցի տատիկն ասաց՝ թուրքը ո՞վ ա, որ թուրքից վախենանք, այս նեղությունն էլ կհաղթահարենք». Ղահրամանյան

«Սարուշենցի տատիկն ասաց՝ թուրքը ո՞վ ա, որ թուրքից վախենանք, այս նեղությունն էլ կհաղթահարենք». Ղահրամանյան
381
Երեքշաբթի, 17 հունվարի, 2023 թ., 00:36

Արցախի տեղեկատվական շտաբի լուսանկարիչ Դավիթ Ղահրամանյանը լուսանկարներ է տարածել՝ կից գրառմամբ. «Պատահական հանդիպում Սարուշենից բռնի տեղահանված 75 ամյա Սվետա բաբոյի հետ:
Շատ կցանկանայի Արցախի բարբառով գրել, սակայն ստիպված եմ գրական հայերենով գրել, որպեսզի բոլորի համար հասկանալի լինի:
-Այս ճանապարհը իմ ամենօրյա ճանապարհն է, անեմ անգամ այստեղով անցնելով սիրտս ցավում է...
Այ են լուսանկարը տեսնո՞ւմ ես: Ձեռքները բռունցք դարձած: Ես էլ էի 88-ին այնտեղ կանգնած: Աղջիկս 14 տարեկան էր, մի օր մնացել էի տանը՝ ճաշ պատրաստելու, տեսնեմ լրիվ թրջված եկել է տուն՝ շորերը փոխելու.
-Մամ, ինչո՞ւ ես տանը:
Չէի ուզում ասել, որ ճաշ պատրաստելու համար եմ մնացել.
-Ոտքերս ջուր են, եկել եմ տաքացնեմ ու նորից դուրս գամ բալա ջան։
-Մամ, ամոթ է, բոլորը հիմա հրապարակում են, հագնվի գնում ենք:
Գիշեր ու ցերեկ միացում էինք կանչում, բայց այսօր ի՞նչ ստացանք:
Են մի լուսանկարը տեսնում ես՝ են ռացիայով տղան քեռուս թոռն է՝ Հարությունյան Արմենը, քեզ նման խելոք, շիկահեր, գանգուր մազերով տղա էր: Բաքվի ջարդերը երբ սկսվեցին՝ ընտանիքով տեղափոխվեցին Ստեփանակերտ: Հաջորդը օրը գնաց կռվելու: Ասում էինք բալա ջան մի քիչ համբերի, տեսնենք ինչ է կատարվում:
Ասաց.
-Բաքվից չեմ եկել տանը նստելու, եկել եմ հայրենիքս պաշտպանելու:
Գնաց ու ... 1992-ին զոհվեց: Են գերեզմանատունը բլրի վրա տեսնո՞ւմ ես: Երբ հուղարկավորեցինք, այնտեղ ամայի դաշտեր էին, հիմա շարժվելու տեղ չկա...
Էհ բալա ջան, ինչ ասեմ, լավ եղիր, պինդ եղիր, թուրքը ո՞վ ա որ թուրքից վախենանք, այս նեղությունն էլ կհաղթահարենք: