«Ստրասբուրգը կյանքում 12,000 իրանցի չէր տեսել». Տիգրան Դավուդյան

Իրանագետ Տիգրան Դավուդյանը ֆեյսբուքյան իր էջում գրել է. «Ֆրանսիայի Ստրասբուրգ քաղաքը կյանքում 12,000 իրանցի չէր տեսել։ Երեկ՝ երկուշաբթի, Եվրոխորհրդարանի նստաշրջանի բացման կապակցությամբ Եվրոպայի տարբեր շրջաններից և հատկապես Ֆրանսիայի ու Գերմանիայի տարբեր շրջաններից, այստեղ էին հավաքվել իրանցի ցուցարարներ։ Նրանք Եվրոխորհրդարանից պահանջում էին «Իսլամական Հեղափոխության Պաշտպան Զորք»-ին ներառել ահաբեկչական խմբերի ցուցակում և ըստ այդմ պատժամիջոցներ կիրառել նրա անդամների դեմ։ Այդ զորքը հիմնվել է Իրանի Իսլամական Հեղափոխությունից հետո և գործունեություն է ծավալել նաև Իրանի սահմնաններից դուրս։ Քվեարկությունը տեղի կունենա հինգշաբթի օրվա նիստում․ Եվրոխորհրդարանն ունի 700 անդամ, որոնցից 100-ն արդեն իսկ նման խնդրանքով դիմել է Եվրոմիության արտաքին գործերի և անվտանգության քաղաքականության հարցերով բարձր ներկայացուցիչ Ժոզեֆ Բորելին։ Իրանցիների երեկվա ցույցի ժամանակ ելույթ ունեցան Եվրոխորհրդարանի նախագահ տիկին Ռոբերտա Մեցոլան, Շվեդիայից արաբ պատգամավոր տիկին Աբիր Ալսահլանին, Բելգիայից իրանուհի պատգամավոր Դարյա Սաֆային և Ստրասբուրգի քաղաքապետի տեղակալ իրանցի Սիամաք Աղաբաբային։ Ֆրանսիայի Ոստիկանությունն անվտանգային առումներով, ցույցի կազմակերպիչներին խնդրել էր սահմանափակել ելույթները։ Եվրոխորհրդարանի բանաձևերը Եվրոմիության համար պարտադրանք չեն»: