«Չի՛ կարելի օտարներից ունենալ այնպիսի ակնկալիքներ, որոնք դու առնվազն ինքդ քեզնից չունես». Արա Պողոսյան

Քաղաքագետ Արա Պողոսյանի գրառումը․ «Շատերը հայհոյում են Ֆրանսիային, թե ինչի՞ ԱԺ նախագահը հայտարարեց, թե չի ճանաչում Արցախի անկախությունը և այլն։ Մյուսները հայհոյում են ԱՄՆ-ին, թե բա իբր «Ցեղասպանություն» բառն արտասանել ես, բա մեր հողերն ինչի՞ հետ չես տալիս, մեկ ուրիշ խումբ էլ հարձակվում է Ռուսաստանի վրա, թե բա պայմանագիր ես ստորագրել, ինչի՞ մեր տեղը մեր գործերը չես անում։
Ու հայերն իրենց խաբված, բոլորի կողմից դավաճանված են զգում, այնինչ պետք էր հասկանալ, որ չի՛ կարելի օտարներից ունենալ այնպիսի ակնկալիքներ, որոնք դու առնվազն ինքդ քեզանից չունես։
Մեր մեջ մտած հակամերժ քարոզիչները, իհարկե, կարողանում են խաղալ այս ամենանուրբ լարերի վրա՝ հմուտ լարախաղացի նման, քանի որ իրենք դրա համար շռայլորեն կպարգևատրվեն իրենց «պատրոնների» կողմից, իսկ հասարակ հայ մարդը, ով ապրում է իր հանապազօրյա քրտինքով վաստակած հացով, նա՛ է լինելու այս քարոզիչների բերած մահաբեր կրակների վառելիքը։
Բոլոր ճիգերն անկասկած ներսից են լինելու, ու փրկությունը ներսից է գալու, այլ ո՛չ թե հյուսիսից, հարավից, արևմուտքից կամ արևելքից»: