«Վոլոդինն արտահայտել է այն մտահոգությունը, որը նաև մենք ունենք». Սեյրան Օհանյան

Ադրբեջանի Միլի Մեջլիսի նախագահ Սահիբա Գաֆարովայի հետ հանդիպմանը ՌԴ Պետդումայի նախագահ Վյաչեսլավ Վոլոդինը երեկ հայտարարել էր. «...Նրանք, ովքեր հայտարարություններ են անում եվրոպական կառույցների ուղղությամբ, կարող են պարզապես կորցնել երկիրը»: Արձագանքելով Վոլոդինի հայտարարությանը՝ ՀՀ պաշտպանության նախկին նախարար, «Հայաստան» խմբակցության պատգամավոր Սեյրան Օհանյանն ասել է. «Երբ երկիրը ուժային կենտրոնների հակամարտության թատերաբեմ ես դարձնում, կան մտահոգություններ, և Վոլոդինն այդ մտահոգություններն արտահայտել է: ՌԴ-ի ու ՀԱՊԿ-ի հետ իրավապայմանագրային ու նաև գործնական մի համակարգ է ձևավորվել, որի հիմքում և՛ հարաբերություններն են, և՛ եռակողմ հայտարարությունները: Ակնհայտ է նաև, որ ՌԴ-ն այսօր խնդիրներ ունի Արևմուտքի հետ: Արևմուտքը մեր թշանմին չէ, բարեկամն է, բայց Արևմուտքն այսօր հակամարտության մեջ է ՌԴ-ի հետ, ու երբ դու պայմանավորվել ես մի համակարգի հետ, որպեսզի իրենք կարողանան իրականացնել ամբողջ գործընթացը ու նաև ներքաշում ես պայմանավորվածության կողմի հակառակորդին, խնդիրներ են առաջանում»,- նշել է Օհանյանը՝ հավելելով. «Վոլոդինը բաց արտահայտել է այն մտահոգությունը, որն այսօր նաև մենք ունենք»: Հարցին՝ իսկ դա որոշակի չափով սպառնալիք չէ՞, ասել է. «Իհարկե, որոշակի չափով սպառնալիք է...»: