«Ի՞նչն է Փաշինյանին այդպես սարսափեցնում «ինքնորոշումից». Նարինե Դիլբարյան

Հայոց լեզվի պատմության ամբիոնի դոցենտ Նարինե Դիլբարյանը գրում է. «Բացառիկ համառությամբ, ի հակառակ միջազգային հանրության, Նիկոլ Փաշինյանը հրաժարվել և հրաժարվում է Արցախի ինքնորոշման իրավունքի համար ոչ միայն պայքարելուց, այլ անգամ արտասանելուց այդ բառակապակցությունը, հրաժարում ՀՀ Անկախության հռչակագրից, սահմանադրության հիմնարար հոդվածներից, նաև իրեն վարչապետության երկրորդ անգամ բերած նախընտրական ծրագրից, իր կառավարության հրապարակված ծրագրից՝ առաջ մղելով կեղծ օրակարգ՝ «խաղաղության», Արցախի ժողովրդի անվտանգության և իրավունքների մասին, թեև ցանկացած ողջամիտ տրամաբանության կրող հասկանում է, որ առանց ինքնորոշման իրավունքի իրացման, քաղաքական կարգավիճակի չի լինում ոչ խաղաղություն, ոչ անվտանգություն, այլ միայն շարունակական ցեղասպանում։ Այս անգամ Բեռլինում
Գերմանիայի կանցլեր Շոյցը Փաշինյանի հետ համատեղ ասուլիսում հայտարարեց, թե «Գերմանիան կարևորում է խաղաղ հանգուցալուծման հասնելը՝ Հայաստանի և Ադրբեջանի տարածքային ամբողջականության, ինչպես նաև Լեռնային Ղարաբաղի քաղաքացիների ինքնորոշման իրավունքի տեսանկյունից։ Ընդ որում, այս բոլոր սկզբունքները հավասարազոր են»: Ի պատասխան՝ վերստին փաշինյանական անդրդվելի հրաժարումը ինքնորոշման իրավունքից։ Եվ ինչն է նրան այդպես սարսափեցնում «ինքնորոշումից», բացարձակ անընկալելի է։ Միջազգային ողջ հանրությունը Արցախի հայերի ինքնորոշման իրավունքից է խոսում, ՀՀ իշխանության համար տաբու է….»: